Jastar saıasaty týraly zańǵa 2015 jyldan beri júıeli ózgeris enbegen – depýtat
«2021 jyly Parlamenttiń birlesken jetinshi shaqyrylym otyrysynda Memleket basshysy jastar saıasaty týraly zańdy jetildirý máselesin kóterdi. Sondaı-aq, onyń árbir Joldaýy men sózderinde jastardy qoldaý boıynsha naqty tapsyrmalar berilip keledi. Osy rette «Qazaqstan Respýblıkasynyń keıbir zańnamalyq aktilerine memlekettik jastar saıasaty máseleleri boıynsha ózgerister men tolyqtyrýlar engizý týraly» QR Zańy jobasy memlekettik jastar saıasaty salasyndaǵy zańnamany jetildirý maqsatynda ázirlendi», - dedi depýtat Elnur Beısembaev Májilistiń jalpy otyrysynda qosymsha baıandamada.
Atap aıtqanda, jastarǵa kórsetiletin áleýmettik qyzmetter, jastardyń damý ındeksi, jastarmen jumys jónindegi maman sııaqty uǵymdardy qoldaný men olardy zańnamalyq bekitý qajettigi týraly aıtyldy.
Sonymen birge, memlekettik organdardyń NEET sanatyndaǵy, ıaǵnı jumys istemeıtin, bilimmen nemese kásibı daıyndyqpen aınalyspaıtyn jáne jumyspen qamtý salasynan tys qalǵan jastarmen qyzmetin jetildirý maqsatynda osy termındi zańdy turǵyda bekitý usynylady.
ıAǵnı, atalǵan sanatty memlekettik organdar quzyreti sheńberine toptastyrý qarastyrylyp otyr.
«Zań jobasynyń maqsaty – memlekettik jastar saıasaty salasyndaǵy qoǵamdyq qatynastardy keshendi retteýdiń tıimdi quqyqtyq negizin qalyptastyrý. Oǵan qosa, atalǵan zańnama aıasynda jastar máselesin biriktirýshi koordınatsııalyq ortalyqtandyrý jumystaryn normatıvtik-aktilerdiń sheńberinde pysyqtaýymyz qajet dep esepteımin. Jastardy damytý ındeksi jastar saıasatyn iske asyrý, monıtorıng, baǵalaý tásilderin birizdendirýge jáne naqty nátıjelerge qol jetkizý úshin memlekettik, ásirese, jergilikti organdardyń jaýapkershiligin arttyrýǵa baǵyttalǵan norma bolýy mańyzdy. Ol úshin ony iske asyrý tetikterin jan-jaqty qarastyryp, bul mýltıplıkatıvti effekt beretin júıeli ózgeriske aınalýy qajet», - dedi E. Beısembaev.
Atalǵan zań jobasy 2021 jylǵy 30 jeltoqsanda QR Parlamenti Májilisiniń qaraýyna engizildi.
«Memlekettik jastar saıasaty týraly zańyna júıeli ózgerister 2015 jyldan beri engizilmegenin atap ótkim keledi. Osy oraıda, zań jobasyn daıarlaýda jumys tobynda memlekettik organ ókilderi, belsendi jastar uıymdary, Prezıdent kadr rezervi men Prezıdent janyndaǵy keńes músheleri, qoǵamdyq pikir belsendileri atsalysty. Qazirdiń ózinde, jumys tobynyń 11 otyrysy, óńirlerdegi arnaıy kezdesýler uıymdastyryldy. Baıandalǵandy eskere otyryp, «Qazaqstan Respýblıkasynyń keıbir zańnamalyq aktilerine memlekettik jastar saıasaty máseleleri boıynsha ózgerister men tolyqtyrýlar engizý týraly» Zań jobasyn birinshi oqylymda maquldaýyńyzdy suraımyn», - dedi E. Beısembaev.
Nátıjesinde otyrysqa qatysqan 97 depýtat zań jobasyn birinshi oqylymda maquldady.
Buǵan deıin Aqparat jáne qoǵamdyq damý mınıstri Darhan Qydyráli jastar saıasaty týraly zań jobasynda qandaı jańashyldyqtar bar ekenin túsindirgen edi.
Zań jobasynda «Jastardyń damý ındeksi», «Jastardyń áleýmettik qyzmetteri», «Ýaqytsha jumysqa ornalaspaǵan jastar (NEET)», «Jastarmen jumys jónindegi maman», «Jastardyń eńbek jasaqtary», «Jastar resýrstyq ortalyqtarynyń fýnktsııalaryn keńeıtý» uǵymdaryn zańnamalyq bekitý usynylǵan.
