Jastar saıasaty men sport máselesi - basty nazarda - QR BǴM keńeıtilgen alqa otyrysy

Bul týraly QR Bilim jáne ǵylym mınıstrliginiń baspasóz qyzmeti habarlady.

Otyrystyń kún tártibinde jastar jáne jalpyhalyqtyq sport máseleleri, memlekettik jastar saıasatyn damytý sııaqty birqatar mańyzdy, strategııalyq máni zor máseleler talqylandy. Jıynda Almaty qalasynyń ákimi Ahmetjan Esimov, QR Prezıdent Ákimshiligi ishki saıasat bóliminiń meńgerýshisi Japsarbaı Qýanyshev, QR sport jáne dene shynyqtyrý isteri agenttigi tóraǵasynyń orynbasary Elsııar Qanaǵatov qatysty.

Jastar saıasaty máselesi, dene tárbıesi, mekteptik jáne stýdenttik sport salasyn damytý máseleleri  alǵashqy ret mınıstrliktiń keńeıtilgen otyrysynda qarastyryldy. Jıynǵa Qazaqstan Respýblıkasynyń Parlament depýtattary, QR Prezıdenti Ákimshiligi men Premer-Mınıstr Keńsesiniń ókilderi,  oblys ákimderi jáne orynbasarlary, 100-den astam joǵarǵy oqý oryndarynyń rektorlary, kolledj jáne kásibı lıtseı, oblystyq bilim basqarma basshylary, bilim jáne ǵylym salasynda jumys isteıtin óńirlik departament dırektorlary, bilim berý uıymdary basshylary, bala jáne bala quqyǵyn qorǵaý basqarma basshylary, jasóspirimder, jastar uıymy ókilderi  qatysty.

- Elbasymyz bıylǵy jylǵy Joldaýynda halyqtyń  sportpen jappaı aınalysýy úshin  spporttyq ınfraqurylymǵa qol jetkizý boıynsha sharalar qabyldaý qajettigine toqtaldy, - dep atap ótti mınıstr óz sózinde. - 2017 jyly Qazaqstan qysqy XXVIII Búkilálemdik Ýnıversıadaǵa qatyspaqshy. Ýnıversıadaǵa daıyndyqty Elbasynyń osy tapsyrmasyn basshylyqqa alyp, jappaı sportpen aınalysýdan bastaýymyz qajet.

Almaty qalasynyń ákimi Ahmetjan Esimovtiń aıtýynsha, Almatyda ótetin Búkilálemdik Ýnıversıada-2017-ge qyzyǵýshylyq arta túsýde. Bul mańyzdy oqıǵa qalanyń ınfraqurylymyn odan ári damytýǵa yqpal etedi. Mysaly, jańadan ashylǵan Alataý aýdanynda 15 myń oryndy Sport saraıy men 2 syrǵanaý katogyn salý úshin jer bólindi. 20 myń oryndyq Olımpıada derevnıasyn salý stýdentter arasynda jataqhana máselesin sheshetin bolady. Almaty ákimi qazirgi tańda qalada jastar máselesi boıynsha naqtyly sharalardyń jasalyp jatqandyǵyn aıtty. Mysaly, Almaty qalasy ákimdigi janyndaǵy jastar isi jónindegi qalalyq Keńes, ınnovatsııa men jańa tehnologııalar jónindegi Keńes jas ǵalymdar ınnovatsııasynyń alǵa jyljýyna yqpal etýde. Qalalyq bıýdjet esebinen bólingen Almaty qalasy ákiminiń granty arqasynda kóptegen jas mamandar bilimderin jetildirdi.

Resmı otyrysta, sonymen qatar Elbasymyzdyń tapsyrmasymen elimizdegi jastar saıasatyna qoldaý kórsetý jáne damytý joldary talqylandy.

Qazaqstan Respýblıkasynyń joǵarǵy oqý ornynda memlekettik baǵdarlama boıynsha, Qazaqstan Respýblıkasynyń bilim salasyn damytý, bilim júıesindegi tárbıelik aıasyn kúsheıtý, Qazaqstan Respýblıkasynyń dene tárbıe jáne buqaralyq sportty damytý joldaryn qarastyrý jolynda resmı májilis, eki sektsııalyq otyrysy ótedi dep josparlanyp otyr.

Álemdiń tájirıbege sáıkes, elge  júktelgen áleýmettik fýnktsııalardy oryndaýǵa qabilettilik sporttyq qyzmet  kórsetýmen halyqtyń 30 paıyzy qamtylǵanda arta túsedi eken.

Qazirgi kezde ártúrli baǵalaýlar boıynsha Qazaqstanda bul kórsetkish 20-dan astam paıyzdy quraıdy.

11 sporttaǵy daryndy balalarǵa arnalǵan mektep ınternatta, 15 joǵary sporttyq sheberlik mektebinde jáne 17 olımpıada rezervin daıyndaý ortalyǵynda 7 211 bala sporttyq sheberligin jetildirýde. Olardy 938 trener daıyndaıdy. «Dene tárbıesiniń muǵalimi» mamandyǵy boıynsha joǵary oqý oryndarynda 16 myńǵa jýyq stýdent bilim alýda.

QR Bilim jáne ǵylym mınıstrligi atalmysh saladaǵy birqatar basty problemalardy anyqtady. Olar: dene tárbıesi muǵalimderiniń sapalyq quramy, balalardy  jasóspirimder sporttyq uıymdarmen qamtý, mektepter sporttyq bazalary, ıaǵnı sport zaldar, sport alańdarynyń jetispeýshiligi.

Jastar saıasaty salasynda mınıstrlik saıasaty jastardyń básekege qabilettiligin, olardyń azamattyq belsendiligin arttyrýdy qoldaý kerektigin alǵa tartyp otyr.

Elbasynyń tapsyrmasyn oryndaý barysynda «Jas ulan» biregeı balalar men jasóspirimder uıymy quryldy. Búgińde uıymda 20 myńnan astam jetkinshek tirkelgen. Barlyq bilim berý uıymdarynda tárbıeleý komponentin kúsheıtý jóninde úlgilik keshendi jospar jasaldy. «Jasyl el», «Dıplommen aýylǵa», «Jastar tájirıbesi» atty jalpyulttyq jobalar júzege asyryldy. 19-dan asa resýrstyq ortalyqtar jumys isteýde.

Mınıstrlik jastardyń jańa bilim salasyndaǵy bastamalaryn qoldaý maqsatynda Ulttyq stýdenttik keńes qurý ıdeıasyn qoldady. Sonymen qatar, Parlament músheleri «QR keıbir zańnamalyq aktilerine jastar saıasaty máseleleri boıynsha ózgerister men tolyqtyrýlar engizý týraly» zań jobasyn qarastyrýda.

Alqa májilisinde elimizdiń qoǵamdyq-saıası, áleýmettik ómirinde jastar belsendiliginiń artqany atap aıtyldy, Máselen, QR Prezıdenti janyndaǵy jastar saıasaty jónindegi keńestiń 70 paıyzy jastar UEU ókilderi bolyp tabylady.

QR BǴM  2020 jylǵa deıingi memlekettik jastar saıasatyn qoldaý tujyrymdamasynyń jobasyn daıyndady. Bul másele alqa májilisiniń arnaıy sektsııasynda qarastyrylady. Tujyrymdama elimizdiń ekonomıkalyq, ınnovatsııalyq damý baǵyttaryndaǵy jastardyń úles-salmaǵyn anyqtaý alýy qajet.

Óz sózin qorytyndylaı kele, QR BǴM basshysy Dúnıejúzilik qysqy ýnıversıadaǵa daıyndyq sharalarynyń qadamdyq josparyn jasaýdy, mektepterdegi sporttyq ınfraqurylymdy damytý, sporttyq  ınventarlarmen qamtamasyz etý máselesin alǵa tartty. Sonymen qatar, Elbasynyń tapsyrmasyna sáıkes, jergilikti atqarýshy organdar aımaqtarda   jastar saıasaty basqarmalaryn qurýdy erekshe baqylaýǵa alýlary qajet ekeni aıtyldy.