Jastar resýrstyq ortalyǵy arqyly 3,3 myń adam turaqty jumysqa ornalasty
NUR-SULTAN. QazAqparat – Elordada «Astana Jastary» ortalyǵy arqyly bir jylda 3 myńnan astam jas turaqty jumysqa ornalasty, dep habarlaıdy QazAqparat.
Elorda ákimdiginen málim etkendeı, búginde «Astana Jastary» Jastar resýrstyq ortalyǵy arqyly jumyssyz júrgen kóptegen adam turaqty qyzmetke ornalasty.
«Nur-Sultan qalasy Jastar saıasaty máseleleri basqarmasynyń baǵyttarynyń biri – jastardy jumyspen qamtý. Bul baǵytta aýqymdy jumystar júrgizilip jatyr. 2020 jyldyń basynan beri eńbekke ornalastyrý máselesimen 9 751 jas jolyqty. Jumyssyzdyqtan áleýmettik qorǵaý sharalarymen 7 452 jas qamtyldy. Onyń ishinde turaqty jumysqa 3 368 adam, jastar praktıkasyna – 552, áleýmettik jumys oryndarynda – 39, qoǵamdyq jumystarǵa – 863 jáne qysqa merzimdi oqýǵa 38 adam joldandy», - dedi Jastar saıasaty máseleleri basqarmasynyń basshysy Qaırat Qambarov.
Sonymen qatar Jumyspen qamtý jol kartasyn júzege asyrý aıasynda 2 592 adam jumysqa ornalasty. Sol sııaqty jastardy jazǵy ýaqytta jumyspen qamtýǵa, stýdenttik qurylys jáne «Jasyl el» eńbek jasaqtary jobasy júrgiziledi. Joba aıasynda maýsym-tamyz aılarynda jumyssyz stýdent pen kópbalaly otbasylardan shyqqan 1 200-ge jýyq jas qamtyldy. Onyń ishinde 731-i - kópbalaly otbasylardan shyqqan.
«Basqarma 2016 jyldan bastap 300-den astam uıymdarmen memarandýmǵa otyryp, «Astana job» jobasyn júzege asyryp keledi. Bul joba boıynsha 3000-ǵa jýyq jas jumysqa ornalasty. Kúnine 5 vakansııa, al jumys izdeýshilerden 10-ǵa jýyq túıindeme túsip otyrady. Bul baǵyttaǵy jumys ary qaraı da jalǵasa beredi. Biz jumys izdep júrgen jastardy jáne jumys usynýshylardy yntymaqtastyqqa shaqyramyz», - dedi Qaırat Qambarov.
⠀
Eger siz jumys izdep júrseńiz nemese sizge jumysshy qajet bolsa, túıindeme men ótinimdi job.astana.kz@mail.ru elektrondy poshtasyna jiberýge bolady. ⠀
Sondaı-aq bos jumys oryndary týraly aqparattar @job_astana_jastary paraqshasynda jarııalanyp otyrady.
