Jastar praktıkasy: 40 myń jas tájirıbeden ótkeni úshin jalaqy alady
ASTANA. KAZINFORM – Jumysshy mamandyqtar jylynyń aıasynda jumyssyz jastar tájirıbeden óte alady.
Túlekter mundaı praktıkaǵa qatysqany úshin 12 aı boıy jalaqy alady. Bul týraly Kazinform agenttiginiń resmı saýalyna bergen jaýabynda QR Eńbek jáne halyqty áleýmettik qorǵaý mınıstrligi málimdedi.
– Jastar praktıkasy — meńgergen kásibi boıynsha tehnıkalyq jáne kásiptik, orta bilimnen keıingi, joǵary, joǵary oqý ornynan keıingi bilim berý baǵdarlamalaryn iske asyratyn bilim berý uıymdarynyń túlekteri qataryndaǵy, aldyńǵy 5 jyl ishinde oqýyn aıaqtaǵan jumyssyz jastarǵa arnalǵan sýbsıdııalanatyn jumys oryndarynyń bir túri, – deıdi mınıstrlik ókilderi.
Jaýaptylar nıetti jastar tájirıbeden qalaı ótetinin túsindirdi.
– Jastar praktıkasy bir jyldan astam jumys istep turǵan kásiporyndar men uıymdarda ýaqytsha jumys oryndaryn qurý arqyly uıymdastyrylady. Jumys berýshi jastar praktıkasyna qatysýshylarǵa kásibı bilimin jáne jumys tájirıbesin berý úshin tájirıbeli jumyskerler arasynan tálimger bekitedi, – deıdi olar.
Túlekter jastar praktıkasyna 12 aı ǵana qatysa alady. Al olardyń jalaqysy bıýdjet qarajaty esebinen sýbsıdııalanady.
– Bul rette sýbsıdııanyń 1 aıdaǵy mólsheri ekologııalyq ústemeaqylar boıynsha tólemderdi qospaǵanda, salyqtardy, mindetti áleýmettik aýdarymdardy, paıdalanylmaǵan eńbek demalysyna ótemaqylardy jáne bank qyzmetterin eskergende, keminde 30 aılyq eseptik kórsetkishti (2025 jyly – 117 960 teńge) quraıdy, – deıdi vedomstvo ókilderi.
Bıyl elimizde dál osy baǵdarlamamen 40 myń azamat tájirıbeden ótedi dep josparlanǵan.
– 2025 jylǵy 3 sáýirdegi jaǵdaı boıynsha jastar praktıkasyna 5 185 jas maman jiberildi, onyń ishinde jumysshy mamandyqtar boıynsha – 2 679 adam. Bul – tájirıbeden ótýshilerdiń 51,7%-y, – deıdi QR Eńbek jáne halyqty áleýmettik qorǵaý mınıstrligi.
Eske sala keteıik, buǵan deıin suranysqa ıe kadr daıarlaýǵa ne kedergi ekenin anyqtap kórgen edik.
Sonymen qatar, jumysshy mamandyqtaryna baılanysty jańa 10 kásibı mereke atap ótiletin boldy.