Jastar ózderine berilip otyrǵan múmkindikti paıdalanýy kerek - depýtat
ORAL. QazAqparat - Batys Qazaqstan oblysyna jumys saparymen kelgen Májilis depýtattary eńbek ujymdary men óndiris oryndarynda, bilim ordalarynda kezdesýler ótkizýde, dep habarlaıdy QazAqparat tilshisi.
Búgin Májilis depýtattary Erjan Qudaıbergen, Ivan Klımenko, Mıhaıl Chırkov jáne Gennadıı Shıpovskıh Joǵary agrarlyq-tehnıkalyq kolledjde bolyp, onyń tynys-tirshiligimen tanysty.
Sonyń ishinde 3D aqparattyq dızaın kabınetinde bolyp, oqytýshylarmen, jastarmen pikirlesti.
Májilis depýtaty Erjan Qudaıbergenniń aıtýynsha, Elbasy Nursultan Nazarbaev jastardy qoldaý, jańa jumys oryndaryn ashý baǵytynda tapsyrmalar berdi.
Qazirgi tańda jastarǵa berilip otyrǵan múmkindik kóp, tek sony paıdalana bilý kerek.
«Kolledj jumysyn kórip, kóńilimiz toldy. Elimizde eńbek naryǵynda suranysqa ıe mamandyqtardyń kópshiligi osynda oqytylady eken. Mańǵystaý, Atyraý oblystarynan kelip, bilim alyp jatqan jastar bar eken. Kúni búgin álemniń damyǵan elderinde ǵylym alǵa ozyp ketti. Olarda 4 jáne 5D úlgileri qoldanylýda. Árıne, 3D úlgisi boıynsha da kóp nársege úırenýge bolady. Eń bastysy, bul jastardyń óz mamandyǵyn ıgerip, bolashaqta jetildire túsýine múmkindik beredi», dedi depýtat.
Erjan Qudaıbergenniń sózine qaraǵanda, Májilis depýtattary «Nur Otan» partııasynyń tapsyrmasymen jylyna tórt ret, josparly túrde óńirlerge shyǵyp, halyqpen júzdesedi.
«Mundaǵy maqsat - eldiń jaǵdaıymen tanysý. Qabyldanyp jatqan zańdar, olardyń qoldanylýy qalaı, kem tustary bar ma, mine, osylarǵa kóz jetkizemiz. Ár depýtat - túrli mamandyq ıesi. Soǵan baılanysty óz túıgen-bilgenderin aıtady. Batys Qazaqstan oblysynda halyqpen júzdesip jatqanymyzǵa búgin úshinshi kún. Turǵyndarmen kezdesip, olardyń da usynys-pikirlerin bilýdemiz. Mańyzdylary aldaǵy ýaqytta Parlament qabyrǵasynda talqyǵa salynyp, eskeriletin bolady», dedi Erjan Qudaıbergen.
Májilis depýtattarynyń óńirdegi sapary 3-4 mamyr kúnderi de jalǵasady.
