Jastar óńirdiń tabysty kásipkerlerimen kezdesti - OQO
ShYMKENT. QazAqparat - Ońtústik Qazaqstan oblysynda «Týǵan jerdi túletken azamattar» jobasy aıasynda jastar jergilikti kásipkerlermen kezdesti.
Oblystyq «Otyrar» ǵylymı-ámbebap kitaphanasynda ótken júzdesýde isin dóńgeletken bıznes ókilderi kásip ashý men tabys tabýdyń qyr-syryn úıretti, dep habarlaıdy QazAqparat tilshisi.
Basqosýdaǵy maqsat - otandyq ónimdi qoldaý men nasıhattaý, ony óndiretin eńbek adamdaryn dáripteý men jastarǵa kásiptik baǵdar berý boldy. Osy jolda oblys ekonomıkasyna ólsheýsiz úles qosyp otyrǵan isker azamattar jas býyn ókilderimen kezdesti. Jınalǵandar kásipkerliktiń qyr-syry týraly emin-erkin suhbattasty. Tabys tabý turǵysynda oı-pikirlerimen almasty.
Qazirgi tańda óńirde kásipkerliktiń aıasy keńeıip, qarqyndy damyp keledi. Basqosýda sóz sóılegen kásipkerlerdiń aıtýynsha, bıznes júrgizý bastapqy kezde qıyn bolǵanymen, qazir memlekettik tarapynan jeńildikter men qoldaý kóp.
«Elbasynyń kásipkerlikti qoldaý baǵytyndaǵy ındýstrııalyq-ınnovatsııalyq damý baǵdarlamasynyń arqasynda óndiris aıasy keńeıip, fabrıkamyz «Qazaqtyń tól ónimi» dep maqtanýǵa turatyn túrli kilemder toqıdy. Jetistigi de jeterlik. Búginde ónerkásip ornynda kilemniń júzden astam túri shyǵady. Sol úshin jastarǵa kásibin ashýdan qoryqpastan, kásipkerlikti úırenýge shaqyrar edim», - dedi jergilikti kilem fabrıkasynyń quryltaıshysy Qarlyǵash Áýezhanqyzy.
Jalpy, kitaphanadaǵy kezdesýdiń jastar úshin paıdasy kóp boldy. Jınalǵandar kásipkerlik jóninde kóp maǵlumattar alyp, oı túıindedi.
