Jastar ómirine qatysty ózekti máselelerdiń biri - olardyń ómirine dástúrli emes dinderdiń aralasýy - dóńgelek ústel otyrysy
ASTANA. Tamyzdyń 10-y. QazAqparat /Aıdar Ospanalıev/ - Búginde jastar ómirine qatysty máseleler óte kóp. Solardyń eń mańyzdysy jastardyń ortasyna dástúrli emes jáne ózge de dinderdiń dendep enip bara jatqandyǵy.
Bul pikirdi búgin Astanada «Jastar arasyndaǵy dinaralyq qatynas: problemalar, olardyń sheshilý joldary» atty taqyrypta ótken dóńgelek ústel otyrysynda Mádenıet mınıstrliginiń Din isteri komıteti Halyqaralyq mádenıet jáne din ortalyǵynyń áleýmettik zertteýler bóliminiń ǵylymı qyzmetkeri Aleksandra Nemova aıtty.
Onyń sózine qaraǵanda, bul máselege nemquraıly qaraýǵa bolmaıdy. «Biz qalyptasqan problemaǵa kóz jumyp qaramaı, kerisinshe ony jedeldetip sheshýge tyrysýymyz qajet. Sebebi dástúrli emes din ókilderi jastardy óz aralaryna kez-kelgen tásilmen tartýǵa tyrysyp baǵýda. Olar túrli jastar klýbtary men hor ánshileriniń úıirmesin uıymdastyryp, jazǵy demalys lagerlerine saıahat jasaý sııaqty kóptegen tásilderdi qoldanyp júr. Olar ózderiniń ánderi men óleńderin jazady. Eldegi dástúrli emes din ókilderi mektepke deıingi balalarmen de odan keıingi jastarmen de tipti qarııalarmen de jumys isteıdi. Olar ózderiniń úgit-nasıhat quraldaryn da jasap alǵan. Sóıtip olar jastardy ózderiniń aralaryna barynsha kóbirek tartýǵa tyrysyp baǵýda», dedi A.Nemova.
Onyń pikirinshe, mundaı jaǵdaıda bizdiń, ıaǵnı qoǵamdyq, jastar uıymdary men túrli qorlardyń, dástúrli dinderdiń basty mindeti - jastar men jasóspirimderge beıtanys dinı uıymdardyń sońy nemen tynýy múmkindigi jóninde keńirek aqparat berý bolýy tıis. «Jalpy eresek adamdar ádette ózderiniń problemalary týraly kóp aıtyp jatady. Al shyndyǵynda bul problemalar eresekterden kóri jastarda kóp. Olardyń ata-anasymen qarym-qatynasynan bastap, oqý ornyndaǵy jaǵdaılary, aýladaǵy, kóshedegi qarym-qatynas - bári de problema. Jastar osyndaı máselelermen bastary qatyp júrgende olarǵa kómekke dástúrli emes dinderdiń ákki ókilderi keledi. Sondyqtan biz jastar men jasóspirimder tárbıesin bir sát te nazardan tys qaldyrmaýymyz kerek», dedi ǵylymı qyzmetker.
