Jastar múddesine qyzmet etetin zań jobasy jasaqtaldy - Májilis depýtaty B. Syzdyqova
TANA. 27 qyrkúıek. QazAqparat /Jasulan Amanbaıuly/ - QR Bilim jáne ǵylym mınıstrliginiń bastamasymen «Memlekettik jastar saıasaty týraly» zań jobasy jaqyn arada Parlament qaraýyna túsedi.
Bul týraly búgin Astanada ótken dóńgelek ústel otyrysy barysynda QR Parlamenti Májilisiniń depýtaty Baqyt Syzdyqova málim etti.
«Biz Bilim jáne ǵylym mınıstrligimen birlesip, «Memlekettik jastar saıasaty týraly» zań jobasyn jasaqtadyq. Bul zań jobasy jastar múddesine tolyqqandy qyzmet etetin bolady», - dedi B. Syzdyqova.
Onyń aıtýynsha, atalmysh joba Parlament qabyrǵasyna jaqyn ýaqyttarda túsip, tómengi palatada talqylanady.
Baqyt Syzdyqovanyń sózine qaraǵanda, qoldanystaǵy zańnyń kemshin tustary kóp jáne jastardyń áleýmettik máselelerin túgelimen kótere almaı keledi. Sondyqtan jastar saıasatyn túbegeıli ózgertetin jańa zań jobasyn jasaqtaý bastamasy kóterildi.
«Qazirgi tańda jastarmen jumys stıhııalyq sıpatta júredi. Saılaý naýqany bastalǵanda partııalar jastardy túrli urandy aktsııalarǵa kóptep tarta bastaıdy. Saılaý aıaqtalysymen olardy umytyp ketedi. «Jastar saıasaty týraly» Zań da jastar máselesin tolyqqandy kótere almaı kele jatyr. Onda barlyǵy 20 bap bar, olardyń 50 paıyzy jumys istemeıdi. Olar shynymen de oryndalmaıdy jáne zań aıasynda qarjy bólinbeıdi», - dep atap kórsetti májilismen.
Onyń aıtýynsha, qoldanystaǵy zańda siltemeli baptar óte kóp.
«Mysaly jergilikti jerde jastar máselesine qatysty suraqtardy sheshý kerek bolsa, jergilikti organnyń qaraýy boıynsha retteledi delinedi. Al ol jerde ákimniń kóńili shaba ma, shappaıdy ma, jastarǵa azamat retinde qoldaý kórsetýge kulyqty ma, qulyqty emes pe ol jaǵy belgisiz. Al jańa zań jobasynda bıýdjet múmkindikterine qaramastan, jastarǵa qoldaý kórsetý mindetteledi. Bizdiń maqsatymyz - áleýmettik sıpattaǵy zańdy ómirge ákelý. Óıtkeni jastardyń aldynda baspana, kvota, jumyspen qamtý, otbasylyq máseleler tur», - dedi B. Syzdyqova.
