Jastar memleket qoldaýyn sezinip keledi - qostanaılyq órt sóndirýshi
24 jastaǵy órt sóndirýshi Damır Baıjarasovtyń qyzmet barysyndaǵy sýreti búkil Qaznetke tanymal boldy. Jeli tutynýshylarynyń kózaıymyna aınalǵan Damır «Táýelsizdik urpaqtary» atty Jastar jylynyń ashylý saltanatyna qatysýǵa shaqyrtý aldy.
«Elimizde jastardy jan-jaqty qoldaýǵa baǵyttalǵan birqatar is-sharany iske asyrý bastaldy. Bul jaı ǵana atap ótetin data nemese áldebir maqsattardyń deklaratsııasy emes. Bul - Memleket basshysy júktegen naqty tapsyrmalar. Biz memleket qoldaýyn únemi sezinip kelemiz. Elbasynyń bastamalaryn Qostanaı oblysynyń órtke qarsy garnızony árqashan qoldaıdy. Astanadaǵy Jastar jylynyń ashylý saltanaty joǵary deńgeıde ótti. Elbasynyń sol basqosýda aıtqan ıdeıalaryn oryndaý úshin bar kúsh-jigerimizdi jumsaımyz. Erinbegen jasqa jumys tabylady. Bastysy, erik-jiger, eldiń damýyna atsalysýǵa degen nıet kerek», - deıdi Damır Baıjarasov.
Eske salsaq, 14 jeltoqsan kúni oblys ortalyǵynda Chehov kóshesinde 5 qabatty turǵyn úı órtenip ishtegiler syrtqa shyǵa almaı qalǵan. Operatsııasy kezinde Damır Baıjarasov óz komandasymen jankeshti áreket jasap, birneshe jandy qutqaryp qalǵan edi.
Naqty aıtqanda, tilsiz jaý tutqynynan 9 adam essiz kúıde tysqa shyǵarylǵan bolatyn. Onyń ishinde 7 adam tiri qaldy, eki adam kóz jumdy. Sol órtte barlyǵy 27 adam qutqaryldy.
