Jastar memleket damýynyń jańa kezeńine daıyn bolýy tıis – Prezıdent

NUR-SULTAN. QazAqparat – Jastar memleket damýynyń jańa kezeńine daıyn bolýy tıis. Bul týraly Aqordada Prezıdenttiń kadr rezervine engen jastarmen kezdesýde Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Men sizderdi elimizdi jańa bıikterge kóteretin patrıot sańlaqtar retinde qarastyramyn. Sizder eldegi eń aýqymdy transformatsııa naqty saladaǵy, óńirdegi, qaladaǵy, aýyldaǵy shaǵyn ózgeristerden bastalatynyn túsinýlerińiz kerek. Árkim óz ornyna, alyp otyrǵan pozıtsııasyna qaramastan eldiń jańarý protsesine úlesin qosýy tıis. Bul sizderdiń jeke jetistikterińizdiń tarıhynyń bastaýy bolyp, jınala kele elimizdiń jańa jetistikteriniń kezekti paraǵyn túzedi. Sizderge jańa jaǵdaıda Qazaqstandy qalyptastyrýǵa týra keledi. Biraq, oǵan bilim, quzyret qajet. Onsyz basqarýshylyq jolda jetistikke jetý múmkin emes. Bilim alý protsesi oqý ornyn bitirýmen aıaqtalmaýy kerek. Shyndap kelgende búkil ómir – bilim alý», - dedi Memleket basshysy.

Qazaqstan Prezıdenti elimizdiń gúldenip, tabysty memleketke aınalýy úshin kóp jumys isteýimiz kerektigin basa aıtty.

«Toqmeıilsýge bolmaıdy. Biz eńbeksúıgish ultqa aınalýymyz kerek. Basshylyqtyń qazirgi býyny, onyń ishinde sizderdiń de bılik basyna keletin sát alys emes. Biz sizderge basqarý tizginin beremiz. Biraq sizder memlekettik basqarýdyń osynaý tizginin alýǵa daıyn bolýǵa tıissizder. Sizderde laıyqty quzyret pen bilim bolǵany jón. Jastarymyz memleket damýynyń jańa kezeńine daıyn bolýy tıis», - dedi Qasym-Jomart Toqaev.