Jastar máselesi sóz boldy
TANA. 5 qazan. QazAqparat - Búgin QR Parlamenti Májilisiniń depýtattary Baqyt Syzdyqova men Jaqyp Asanov Astana qalasyndaǵy ekinshi Qazaqstan-nemis forýmyna kelgen jastar delegatsııasyn qabyldady, dep habarlaıdy Májilistiń Baspasóz qyzmeti.
Aıta ketý kerek, meımandardyń ishinde kommertsııalyq emes uıymdardyń jastarmen jáne áleýmettik máseleler salasy jáne ony zerdeleý jumystary jónindegi halyqaralyq federatsııanyń, Tehnıkalyq kómek berý federaldyq agenttiginiń, Otbasy, qartaıǵan adamdar, áıelder men jastar isi jónindegi federaldyq mınıstrliginiń, birqatar germanııalyq úkimettik emes uıymdardyń ókilderi boldy.
Depýtattar meımandarǵa Qazaqstan týraly, el Parlamentiniń qurylymy jaıly jan-jaqty áńgimelep berdi. Elimizdegi genderlik saıasat jóninde de sóz boldy.
Negizgi taqyryp jastar saıasaty tóńireginde órbidi. Baqyt Syzdyqova ózi jetekshilik etetin «Jastar Parlamenti», onyń atqaryp otyrǵan qyzmeti týraly baıandap ótti. Jastar saıasatyn zańnamalyq qamtamasyz etý týraly sóz qozǵalǵanda Májilis depýtattary búgingi tańda jastardyń máselesin sheshýge baǵyttalǵan jańa zań jobasy ázirlenip jatqanyn habarlady.
Pikir almasý túrinde ótken kezdesýde úkimettik emes uıymdardyń qoǵamdaǵy róli jaıly áńgime boldy. Depýtat Jaqyp Asanov óz sózinde atalǵan salany damytýǵa baǵyttalǵan zańdy jetildirýdiń nátıjesinde memlekettik áleýmettik tapsyrys arqyly ÚEU-ny bıýdjetten qarjylandyrý sońǵy jyldary on ese óskenin tilge tıek etti.
Taraptar Qazaqstan-Germanııa arasyndaǵy qarym-qatynasty, onyń ishinde jastar saıasatyna qatysty tájirıbe almasýdy jáne parlamentaralyq baılanysty damytý qajettigin aıtty.
Almanııadan kelgen meımandar Májilis úıin aralap kórip, fotosýretterge tústi.
