Jastar qoı terisin jamylǵan dinı aǵymdardan saq bolǵany jón - Ábsattar qajy Derbisáli
ASTANA. 12 qańtar. QazAqparat - 2012 jyly Atyraý oblysynda sáláfı baǵyttaǵy 27 adam jergilikti ımamdardyń arqasynda hanafı mázhabyn ustanatyn boldy.
Bul týraly búgin Qazaqstan musylmandary dinı basqarmasynyń bas ımamdarynyń basqosýynda Atyraý oblysyndaǵy ókil ımam Amantaı Sádıev málim etti.
Onyń aıtýynsha, teris aǵymnyń yqpalynda júrgen atalmysh jastar budan bylaı hanafı mázhabyn ustanatynyn aıtyp, ımamǵa moınsunatynyn bildirgen. Mundaı jaǵymdy jańalyqtar Aqtóbe oblysynda da bar. Qateligin moıyndap, ımamnan keshirip surap kelgender kóp eken. Bas múftı, sheıh Ábsattar qajy Derbisáli mundaı máselelerdi satylap sheshýdi tapsyrdy.
«Qoı terisin jamylǵan dinı aǵymdardyń jymysqy is-áreketin toqtatý, aǵartýshylyq baǵytta tynbaı tirlik etý, memlekettik mekemelerde, oqý oryndarynda el birligi, halyq yntymaǵy, ıman baılyǵy jaıly ýaǵyz-nasıhattarymyzdy kúsheıtýimiz kerek. Sonda ǵana keıbir dinı aǵymnyń jeteginde ketken jastarymyz teris pıǵyldy pash etip júrgen sektalardan sekem alyp, babalarymyzdan jetken dástúrli dinimiz - Islammen qaýyshady. Mine, biz osy baǵyttaǵy júıeli jumysymyzdy jalǵastyryp, adamdardyń júregine jol taýyp, izgiliktiń, ımannyń, Islamnyń, danalyq joldyń dánin sebe berýimiz kerek. Halyqty dinı saýattandyrmaıynsha, búginde boı kórsetip jatqan din salasyndaǵy keıbir máselelerdiń kúrmeýin sheship, túıinin tarqatam deý - ábestik», - dep atap ótti Dinbasy.
Esep berý jıynynda sonymen qatar buqaralyq aqparat quraldarymen baılanysty jaqsartý, QMDB ýaǵyz-nasıhat tobyn bekitý, ınternet júıesin jetildirip, paıdalaný, dinı basqarma tapsyrmalarynyń oryndalýy, Zeket qory týraly, qajylyq, medreselerge oqýlyq jazý, ımamdardyń kıim mádenıeti, olarǵa semınarlar uıymdastyrý, azanshy máselesi, basqarý-baqylaý, oqý-aǵartý, ýaǵyz-nasıhat jumystary, dinı rásimderdiń jaǵdaıy, qurylys, sharýashylyq jumystary, meshitterge at berý máselesi qaralyp, pysyqtaldy. Tıisti tapsyrmalar berildi.
«Bıyl elimiz úshin jaqsy jyl boldy. Jýyrda Elbasymyz Nursultan Ábishuly Nazarbaev halyqqa joldaǵan Joldaýynda elimizdiń 2050 jylǵa deıingi damý strategııasyn aıqyndap berdi. Onda din salasyna qatysty birqatar máseleler kóterilip, ony sheshý joldary qarastyrylǵan. Dinı basqarma osy baǵyt boıynsha jumys jasap keledi. Bul ıgi-dástúr budan bylaı da jalǵasa bermek», - dedi Dinbasy kezekti tóralqa otyrysynda.
Esep berý otyrysy eki kúnge sozylmaq.
