Jastar kongresi aǵa-kókesiz tabysqa jetkenderdi izdeýge kiristi

ASTANA. QazAqparat - Qazaqstan jastarynyń kongresi «100 jańa esim» jobasynyń ekinshi kezeńine óz úmitkerlerin usynady. Osyǵan oraı, atalǵan uıym «7 jalyn» atty respýblıkalyq jobany jarııalady. Sonyń aıasynda úzdik jetilik anyqtalady, dep habarlaıdy QazAqparat tilshisi.

Uıym basshysy Toqtar Bolysovtyń aıtýynsha, kongrestiń atynan jeti emes, odan da kóp úmitker «100 jańa esim» jobasyna usynylady. Alaıda «7 jalyn»-ǵa erekshe qoldaý jasalady.

«Endi, qazaq halqy úshin «7» qasıetti san ekenin bárimiz jaqsy bilemiz. Sol sebepti biz dál osy sandy tańdadyq. Al «jalyn» dep alǵanymyz, naǵyz jalyndap turǵan jastar bolsyn dep tiledik. Negizi, biz barlyq úmitkerlerdiń ishinen 20-30 adamdy tańdap, «100 jańa esim» jobasyna usynamyz. Degenmen, olardyń ishindegi «7 jalyn»-ǵa erekshe qoldaý jasalady. Buqaralyq aqparat quraldaryna shyǵaramyz, qoǵamdyq sharalarǵa tartamyz, qosymsha ınvestor izdeımiz jáne taǵysyn taǵylar», - dedi T.Bolysov búgin «7 jalyn» jobasyn tanystyrý rásiminde. 

Onyń aıtýynsha, búginnen bastap «7 jalyn» jobasy boıynsha ótinim qabyldaý naýqany bastaldy. Atalǵan kezeń osy aıdyń sońyna deıin jalǵasady. Al 15 qazanda jeńimpazdar anyqtalady. Talap boıynsha úmitkerdiń jasy 18-28 aralyǵynda bolýy tıis. Onyń ózi qyzmet etip jatqan salasynda naqty jetistikterge jetken bolýy shart.

Jobanyń negizgi maqsaty - tabysty jastardy kórsetý, olardyń ómirlik jolyn basqalarǵa úlgi etý.

«Atalǵan bastamanyń ıdeologııalyq maqsaty da bar. Biz tanys-tamyrsyz tabysqa jetýge bolatynyn kórsetkimiz keledi. Qazaqstanda kez kelgen adam óz maqsatyna aǵa-kókesiz de jete alady. Osyny kórsetýimiz kerek. Al «7 jalyn» sonyń bir dáleli bola alady», - dep atap kórsetti T.Bolysov. 

Aıta keteıik, jaqynda QR Kásipodaqtar federatsııasy da óz úmitkerlerin usynatynyn málimdegen bolatyn. «100 jańa esim» jobasynyń ekinshi kezeńi aıasynda barlyq ótinimder kelesi aıdyń ortasyna deıin qabyldanady. Odan keıin onlaın daýys berý bastalady.