Jastar keńesi nemen aınalysady

ASTANA. KAZINFORM — I shaqyrylymdaǵy Quryltaı janynan Jastar keńesi qurylady. Ol jastar bastamalaryn biriktirýge, olardy júıeli túrde ilgeriletýge jáne Quryltaımen tikeleı ózara is-qımyl ornatýǵa arnalǵan turaqty dıalog alańyna aınalady.

126 jas, ondaǵan bastama: Qazaqstanda jańa jastar qozǵalysy paıda bolady
Foto: Halyq keńesi

Keńestiń basty mıssııasy – belsendi, bastamashyl jáne jasampaz jastardy biriktirý, olardyń eldiń qoǵamdyq ómirine etene aralasýyna jaǵdaı jasaý jáne jas urpaqty el damýynyń strategııalyq mindetterin sheshýge tartý.

Keńes quramyna Quryltaı depýtattaryn, jastar uıymdary men birlestikteriniń ókilderin, óńirlerdegi belsendilerdi, sondaı-aq túrli kásibı saladaǵy jas mamandardy engizý usynylyp otyr.

Óńirlerdiń keńinen ókildik etýine erekshe nazar aýdarý kózdelgen. Shaǵyn qalalardaǵy, aýyldyq eldi mekenderdegi jáne shalǵaı aýdandardaǵy jastardyń úni iri qalalar jastarynyń bastamalarymen qatar jalpyulttyq deńgeıde estilýi mańyzǵa ıe.

Keńes jumysynyń jeke bir baǵyty halyqaralyq jastar yntymaqtastyǵyn damytýǵa, qazaqstandyq jastardyń múddelerin bildirýge jáne olardyń bastamalaryn halyqaralyq alańdarda ilgeriletýge arnalady.

Quryltaı janynan Jastar keńesi qurylatynyn, mundaı sheshim joǵary zań shyǵarýshy organnyń otyrysynda qabyldanǵanyn jazǵan edik.