Jastar qant dıabetine kóptep shaldyǵyp jatyr

ASTANA. KAZINFORM – Qazaqstanda qant dıabetimen aýyratyndardyń úshten birin jastar qurap otyr. QR Prezıdenti Іs basqarmasyna qarasty medıtsınalyq ortalyqtyń bas endokrınology Gúlmıra Toqseıtovanyń aıtýynsha, keıingi onjyldyqta elde II tıptegi qant dıabeti dıagnozy qoıylǵan adamdar kóbeıdi. Aldyn ala dıabet kúıinde júrgen, artyq salmaǵy bar, arterııalyq qysymy joǵary, holesterın jáne maı fraktsııalary joǵary, fızıkalyq belsendiligi tómen adamdar jeterlik.

– Qazirgi klınıkalyq zertteýlerge súıensek, árbir on eresektiń bireýi II tıptegi qant dıabetimen aýyrady, al on adamnyń ekeýinde bul derttiń belgileri bar, biraq áli dıagnoz qoıylmaǵan. Ókinishke qaraı, II tıptegi qant dıabeti jasaryp keledi, qazir bul dıagnozben tirkelgenderdiń shamamen 33%-yn balalar men jastar quraıdy. Sebebi retinde rafınadtalǵan ónimderdiń qoljetimdiligin, fastfýd, tátti gazdalǵan sýsyndar jáne joǵary kalorııaly taǵamdardy artyq tutynýdy aıta alamyz, – dedi medıtsına ǵylymynyń kandıdaty.

Osy tusta sarapshydan «Qazaqstanda tátti sýsyndar óndirisine qatysty qatań zańdar engizilýge tıis pe?» dep suraǵan edik. Óz kezeginde Gúlmıra Toqseıtova bundaı shekteýler engizý jaýapty vedomstvolardyń sheshimine qatysty másele ekenin jetkizdi. Degenmen halyq densaýlyǵynyń keleshegi úshin ýákiletti tulǵalar taqyrypty memlekettik deńgeıde kóterýi qajet ekenin jasyrmady.

Buǵan deıin tátti sýsyndardyń qant dıabetine áseri, oǵan qatysty qosymsha salyq salý jóninde taldaý jazǵan edik.