Jastar kadrlyq rezervi: Japal Dolıev aǵa-kókesiz qalaı «óskenin» aıtyp berdi
Bıyl «Jastar kadrlyq rezervi» jobasynyń iske qosylǵanyna 10 jyl tolady. Ataýly kúnge baılanysty QR Prezıdenti janyndaǵy Ortalyq kommýnıkatsııalar qyzmetinde brıfıng ótti.
«Bolashaq» qaýymdastyǵynyń atqarýshy dırektory Laýra Demesinova bıyl osy joba arqyly 51 úzdik jas rezervke alynatynyn aıtady.
«Bul ıdeıany 2008 jyly Elbasy Nursultan Nazarabev alǵash ret aıtqan bolatyn. Ýaqyt jobanyń tıimdiligin kórsetti. 10 jylda 15 myńnan astam jas qatysyp, 468 jas QR Parlamentiniń qos palatasynda, ortalyq memlekettik organdarda, ulttyq kompanııalarda tájirıbeden ótti. Sonyń kóbi qazir ózderine artylǵan senimdi aqtady. Bıyl sondaı múmkindikke 51 jas ıe bolady. Onyń 34-i - Parlamentke, 17-si - ortalyq memlekettik organdar men ulttyq kompanııalarǵa tańdap alynady», - dedi ol.
Osy jobaǵa alǵashqylardyń biri bolyp qatysqan, qazir Nur-Sultan qalasy ákimdigi din máselelerin zertteý ortalyǵynyń basshysy qyzmetin atqaryp júrgen Japal Dolıev óziniń qyzmette ósý jolyna toqtaldy.
«2008 jyly jastar forýmyna kelip, osy rezerv týraly alǵash estigen bolatynmyn. 2009 jyly baǵymdy synap, jolym boldy. Joba aıasynda QR Mádenıet jáne aqparat mınıstrliginde is-tájirıbeden óttim. Aýyldan shyqtym dep otyrmyn ǵoı. Qoı baǵyp júrgende «Basymdaǵy oılardyń bári osy aýylda qalady ǵoı» dep oılaıtynmyn. Sondyqtan, bul múmkindik men úshin rasymen áleýmettik lıft boldy. Sol kezdegi QR Monopolııalarǵa qarsy agenttiktiń konkýrsyna qatysyp, jumysqa turdym. Aýdandyq deńgeıden oblystyq satyny attap, birden ortalyq organǵa jumysqa alynýym ol kezde ertegi sııaqty estiletin. Osy 10 jyl ishinde ózimniń ómirlik qundylyqtarymdy aıqyndadym. Tek shetelde oqyp kelgen adamdar emes, qyzmetin aýyldan bastaǵan jastar da el astanasynda tabysqa jete alatynyn, eshqandaı aǵa-kókesiz-aq qyzmette óse alatynyn dáleldegim keldi. Ol oıym iske asty dep oılaımyn», - dedi Japal Dolıev.