Jastar ıslamnyń shynaıy maqsatyn durys túsine bilýi tıis - Bas múftı
ASTANA. 25 qarasha. QazAqparat - Búgin Astanadaǵy «Shabyt» saraıynda kolledj ben ýnıversıtet stýdentteriniń qatysýymen «Otan. Rýhanııat.Jastar» ǵylymı-tanymdyq konferentsııasy ótti.
Bul týraly astana.gov.kz Astana qalasynyń resmı saıtynan habarlady.
Konferentsııada dinniń negizgi baǵyttary, onyń adamǵa qajettiligi men jastardyń memlekettegi róli talqylandy. Sonymen qatar, sharaǵa qatysýshylar jastardy dinı saýatyn arttyrýǵa, jat dinı aǵymdarǵa enbeýge shaqyrdy.
«Jastar bizdiń qoǵamymyzdyń belsendi bóligi, memlekettiń qozǵaýshy kúshi bolyp tabylady. Qazirgi ýaqytta álemde jat aǵymdar men jalǵan dinı ilimderdiń sany kún saıyn artyp keledi. Sondyqtan jastar ıslamnyń shynaıy maqsatyn durys túsine bilýi tıis. Biz jastardy ıslamnyń dástúrli qaǵıdalaryn saqtap, mádenı jáne rýhanı qundylyqtarymyzdy odan ári damytýǵa shaqyramyz», - dedi Qazaqstan Respýblıkasynyń Bas múftıi, QMDB tóraǵasy Erjan Maıamerov óz sózinde.
Uıymdastyrylǵan is-sharanyń maqsaty -dinniń negizgi qundylyqtaryn dáripteý, jastardyń dinı saýatyn arttyrý, QR Prezıdentiniń «Qazaqstan - 2050» strategııasy» joldaýynda kóterilgen negizgi máselelerdi iske asyrý, el arasynda destrýktıvti, jat aǵymdardyń taralýynyń aldyn alý, sondaı-aq, jastar arasynda toleranttylyq pen otansúıgishtikti nasıhattaý bolyp tabylady.
Konferentsııa jumysyna Qazaqstan Respýblıkasynyń Bas múftıi, QMDB tóraǵasy Erjan Maıamerov, qoǵam qaıratkerleri, depýtattar, dinı qyzmetkerler, sonymen qatar, Olımpıada chempıony Baqtııar Artaev qatysty. Shara sońynda elordalyq jastar úshin elimizge tanymal ánshi, termeshi, MýzART tobynyń múshesi Meırambek Bespaevtyń qatysýymen kontsert uıymdastyryldy.
