«Jastar» ǵylymı-zertteý ortalyǵy Din isteri mınıstrligine berildi
ASTANA. QazAqparat - «Jastar» ǵylymı-zertteý ortalyǵy» JShS Din isteri jáne azamattyq qoǵam mınıstrligine berildi, dep habarlaıdy QazAqparat
«QR Úkimetiniń 2017 jylǵy 4 qyrkúıektegi qaýlysymen «Jastar» ǵylymı-zertteý ortalyǵy» jaýapkershiligi shekteýli seriktestigindegi memlekettik qatysý úlesine ıelik etý jáne paıdalaný quqyqtary QR Din isteri jáne azamattyq qoǵam mınıstrligine berildi», - delingen taratylǵan habarlamada.
Aıta keteıik, osy ýaqytqa deıin «Jastar» ǵylymı-zertteý ortalyǵy QR Bilim jáne ǵylym mınıstrliginiń qaramaǵynda boldy.
Ortalyqtyń Din isteri jáne azamattyq qoǵam mınıstrliginiń qaraýyna ótýi memlekettik jastar saıasatyn iske asyrý tıimdiligin, sondaı-aq jastarmen jumys jasaıtyn mamandardyń quziret deńgeıin arttyrmaq. Onymen birge, jastar arasyndaǵy táýekeldi anyqtaý jáne aldyn alý boıynsha jedel sharalar qabyldaýǵa múmkindik beredi.
«Jastar» ǵylymı-zertteý ortalyǵy 2013 jyly L.N. Gýmılev atyndaǵy Eýrazııa ulttyq ýnıversıtetiniń janynda quryldy. Ortalyq erekshe mártebege ıe. Onyń qyzmeti «Memlekettik jastar saıasaty týraly» Qazaqstan Respýblıkasynyń Zańymen bekitilgen. Zańnyń 24-babyna sáıkes atalmysh ortalyq ǵylymı zertteýler júrgizedi jáne memlekettik jastar saıasatyn iske asyrýdy ádistemelik qamtamasyz etýdi júzege asyrady.
Ortalyq jyl saıyn jastar arasynda áleýmettik zertteýler júrgizedi, «Qazaqstan Jastary» Ulttyq baıandamasyn, jastar saıasatynyń ınstıtýttaryna arnalǵan ádistemelik quraldar men usynymdardy ázirleıdi. Sondaı-aq júıeli túrde jastarmen jumys jasaıtyn mamandardyń quziretin arttyrý boıynsha is-sharalar jıynyn ótkizip turady.
