Jastar ǵylymǵa bet bura bastady - Bilim mınıstri
ASTANA. QazAqparat - Ǵylym salasyn qarjylandyrýdyń jańa júıesi óz jemisin bere bastady, dep esepteıdi QR Bilim jáne ǵylym mınıstri Aslan Sárinjipov.
"Qazirgi ýaqytta ǵylymdy qoldaý jáne qarjylandyrý baǵytyndaǵy jaǵdaı 90-shy jyldarǵa qaraǵanda túbegeıli ózgergen. Ol kezde kóptegen ǵalymdar shetelge jumys isteýge ketip qalǵan bolatyn. Búginde Ǵylym týraly zań engizildi, onyń aıasynda qarjylandyrý ulǵaıyp otyr. Atap aıtar bolsaq, qarjylandyrýdyń úsh arnasy bar: bazalyq, granttyq jáne maqsattyq. Jyl saıyn quıylatyn qarajattyń kólemi de artýda. Byltyr 10 mlrd. teńge bólindi. Bul júıe óz jemisin bere bastady", - dep atap ótti mınıstr Ortalyq kommýnıkatsııalar qyzmetinde ótken brıfıngte.
Onyń aıtýynsha, aǵymdaǵy jyly qazaqstandyq ǵalymdardyń 2000-nan astam halyqaralyq ǵylymı jarııalanymdary jaryqqa shyǵady dep josparlanýda. Bul ótken jylmen salystyrǵanda, 10-20 paıyzǵa joǵary.
Sondaı-aq A. Sárinjipov jastardyń ǵylym salasyna bet bura bastaǵandyǵyn da erekshe aıtyp ótti.
"Elde jas ǵalymdarǵa barlyq jaǵdaılar jasalǵan. Soǵan oraı jastardyń ǵylymdaǵy úlesi de artýda", - deıdi ol.
