Jastar eńbekqorlyǵymen básekege túsýi kerek - depýtat

ASTANA. QazAqparat - Memleket tarapynan, ásirese Elbasynyń jeke bastaýymen jastarǵa kórsetilip otyrǵan qamqorlyq pen qoldaý az emes. Mundaı pikirdi Senat depýtaty Álimjan Qurtaev aıtty, dep habarlaıdy QazAqparat.

«Bilim salasynda jas mamandardy aýylǵa tartýdy kózdeıtin «Dıplommen aýylǵa» baǵdarlamasy, shetelde bilim alýǵa múmkindik beretin «Bolashaq» halyqaralyq stıpendııasy, «Serpin» baǵdarlamasy júzege sátti asyrylyp keledi. «StartapBolashak» bıznes-jobalar baıqaýy ǵylym men tehnologııa, ınnovatsııaǵa jaqyn jas qazaqstandyqtardyń tanylýyna múmkindik beredi. Ǵylym, shyǵarmashylyq, qoǵamdyq qyzmet, sportta erekshe kózge túsken talantty jastarǵa «Daryn» memlekettik jastar syılyǵy tabystalady. Prezıdent tapsyrmasymen qabyldanǵan «7-20-25» baǵdarlamasy ár jas otbasyǵa yńǵaıly sharttarmen baspana alýǵa múmkindik beredi», - deıdi halyq qalaýlysy.

Onyń aıtýynsha, qazaqstandyq jastar basqa emes, bilimimen, eńbekqorlyǵymen básekege túsýi kerek.

«Jastar - elimizdiń jarqyn bolashaǵyna jeteleıtin basty qozǵaltqysh. Osy oraıda, Elbasy men Qazaqstan halqynyń jastarǵa úmit artýy oryndy ekenine kúmán joq. Elbasynyń Jastar jylynyń ashylýy kezinde jas urpaqtyń áleýmettik jaǵdaıyn kóterýge arnalǵan tapsyrmalary olardyń el ekonomıkasy men rýhanııatyn damytýyna úlken demeý bolary sózsiz. Óz kezeginde olar da Otanyna adal qyzmet etip, órkenıetke umtylary anyq. Jastar bilimimen, tárbıesimen, otansúıgishtigimen, eńbekqorlyǵymen básekege túsýi kerek», - dep túıindedi sózin Álimjan Qurtaev.

Foto: egemen.kz