Jastar elimiz táýelsizdik alǵannan beri qoldaý kórip keledi - JOO ustazy
Onyń pikirinshe, árbir memlekettiń bolashaǵy jastardyń qolynda. Memleket tarapynan jastardy qoldaý sharalary bizdiń elimizde táýelsizdik alǵan jyldardan beri júrgizilip kele jatyr. Jastardyń shetelde bilim alýyna múmkindik beretin «Bolashaq» baǵdarlamasynyń iske asyrylýy, jas startapshylardy qoldaıtyn zańnamalardyń qoldanylýy jáne múmkindigi bar jobalardy bıýdjettik sýbsıdııalaý, «Dıplommen aýylǵa» baǵdarlamasy jáne taǵy basqalary sonyń aıqyn kórinisi bolyp tabylady.
«Elbasy Nursultan Ábishuly Nazarbaevtyń bıylǵy jyldy Jastar jyly dep jarııalaýy aǵa býyn ókilderiniń ońdy isterin jalǵastyrýshy jastar qaýymynyń rýhanı shyńdalýy men áleýmettik damýyna úlken serpilis beretin bastama bolyp otyr. Jastar jylynyń saltanatty ashylýynda Prezıdent jastardyń bolashaqtaǵy basym nazar aýdarýy tıis baǵyttary men arman-maqsattarǵa jetý jolynda atqarylýy tıis sharalar júıesin tilge tıek etti», - deıdi jas ustaz.
Elbasy atap ótkendeı, qazaqstandyq jastardyń arasynda jumyssyzdyq joq, kerisinshe jumys ornyna qyzmetke ornalasatyn mamandyq ıeleri tapshy. Onyń ústine kóptegen mamandyqtar bolashaqta joıylýyna baılanysty jańa mamandyqtarǵa suranys kóbeımek. ıAǵnı, jastar mektep kezinen mamandyq tańdaýda muqııat bolýy kerektigin aıtty. Osy baǵytta jastardy qarjylaı jáne áleýmettik qoldaý maqsatynda olardy jaldamaly páterlermen neǵurlym kóbirek qamtamasyz etý, 2019-2021 jyldary bıýdjetten 32,1 mıllıard teńge bóle otyryp, barlyq óńirde «Jas kásipker» baǵdarlamasyn júzege asyrý, joǵary oqý oryndary men kolledj stýdentteri úshin barlyǵy 70 myń oryndyq jataqhanamen qamtamasyz etý júkteldi. Budan bólek, eriktiler qatarynda belsendi qyzmet atqaryp júrgen stýdentterdiń shákirtaqysyn 30 paıyzǵa arttyrý, tıimdiligi jaǵynan syrttaı oqytý formasynan birneshese ese asyp túsetin qashyqtyqtan oqytý tehnologııasyn jetildirý, «Jas maman» jobasyn júzege asyrý jáne taǵy basqa mindetter tapsyryldy.
«Jastar bul bastamany ózderine kórsetilgen qoldaý ǵana emes, óz áleýetin tolyq ashatyn múmkindik retinde qabyldaý kerek. Oqytýshy retinde, jas ǵalym jáne maman retinde bul bastamalardyń barlyǵy jaqsy nátıjelerge alyp kelerine senemin. 100/200 qaǵıdasy negizinde jastardy zamanýı tehnıkamen jabdyqtalǵan úzdik joǵary oqý oryndarynda oqytatyn bolsaq, JOO bitirýshi jas túlekterdiń básekege qabilettiligi eselep artady dep oılaımyn. Ǵylym men bilim - memleket qurýshy negizgi obektiler, al jastar - bolashaqty órkendetýshi sýbektiler. Bul baǵytta barlyǵymyz aıanbaı eńbek etsek, álemniń damyǵan 30 eli qataryna barynsha jedel enerimiz sózsiz. Tek jańashyldyqtan qoryqpaı, barlyǵyn baıyppen qabyldap, joǵary bilim-biliktilikpen iske asyratyn bolsaq, ondaǵan jyldardan soń álemniń qýatty derjavalarynyń birine aınalarymyz da ǵajap emes», - dedi Á.Tólepov.
Eske sala keteıik, budan buryn batysqazaqstandyq stýdenttiń umytylyp bara jatqan esimderdi jańǵyrtýǵa úles qosqysy keletinin jazǵan bolatynbyz.
