Jastar beıbit kúnniń qadirin bilýi kerek – soǵys ardageri
ALMATY. KAZINFORM – Almatyda UQK Shekara qyzmetiniń uıymdastyrýmen Jeńistiń 80 jyldyǵyna arnalǵan ǵylymı-praktıkalyq konferentsııa ótti.
Uly Jeńis taǵylymdary: tarıhı jady, patrıotızm jáne zamanaýı syn-qaterler» atty ǵylymı-tájirıbelik konferentsııaǵa soǵys ardagerleri, tyl eńbekkerleri, ulttyq ǵylym akademııasy, «Generaldar keńesi» respýblıkalyq qoǵamdyq birlestiginiń ókilderi, ulttyq qaýipsizdik komıtetiniń akademııasy, ulttyq qaýipsizdik komıtetiniń shekara akademııasynyń ǵalymdary, áskerı qyzmetkerler men joǵary oqý oryndarynyń stýdentteri qatysty.
Konferentsııanyń maqsaty – jastar arasynda ekinshi dúnıejúzilik soǵysy týraly bilimderin qalyptastyrý jáne ardagerler erligin máńgi este saqtaý. Jas urpaqty Otandy súıýge, qorǵaýǵa tárbıeleý. Jastardy elin, jerin qurmetteıtin sanaly azamat etip tárbıeleý, erlik isterge taǵzym etýge, erlik pen batyldyqqa, ata-baba rýhyna taǵzym etýge baýlý.
Shara barysynda bıyl ǵasyr toıyn toılaǵaly otyrǵan soǵys ardageri Mıhaıl Ýkolov jınalǵandardy Jeńistiń 80 jyldyǵy merekesimen quttyqtap, elge beıbitshilik, bereke-birlik tiledi.
– Qorǵanysta turyp, biz ólispeı, berispedik. Beıbitshilikti saqtaý keleshek urpaǵymyz úshin mańyzdy edi. Jeńis ońaı kelgen joq. Jastar beıbit kúnniń qadirin bilýi kerek,– dedi ardager.
Áskerı ǵylymdardyń doktory, akademık Dosaı Abraımov qazaqstandyq jaýyngerlerdiń fashıstik basqynshylardy jeńýge qosqan úlesi men áskerı tarıhtyń basqa da máseleleri týraly aıtty.
– Halyq Qaharmany Raqymjan Qoshqarbaevtyń erligi jaıynda talaı ret aıtyldy. Reıhstagqa birinshi bolyp jeńis týyn tikkenin de kópshilik jaqsy biledi. Ekeýdiń erligin sol kúnniń erteńine-aq maıdan gazetteri jarysa jazyp jatty. Biraq pendeshilikpen ádildikten attap ketkender de boldy. Sol kezdegi solaqaı saıasatqa baılanysty «Jeńis týyn» tigý mártebesi tek orys jáne grýzın ultyna tıesili bolý kerek edi. Sondyqtan soǵystyń qandy qyrǵyny báseńdegen sátte Egorov pen Kantarııa Jeńis týyn resmı túrde Reıhstagtyń tóbesine aparyp qadady delingen. Raqymjan Qoshqarbaevtyń erligi araǵa jyldar salyp moıyndaldy, – dedi ol .
Konferentsııa aıasynda kórme uıymdastyryldy.
Bıyl Ekinshi dúnıejúzilik soǵystaǵy (1941–1945) Jeńiske 80 jyl tolady. Osyǵan baılanysty TMD elderinde 2025 jyl «Jeńistiń 80 jyldyǵy jáne natsızmge qarsy kúrestegi birlik jyly» dep jarııalandy.