Jastar baspana alý úshin shetel asyp jumys isteýge májbúr – depýtat

ASTANA. KAZINFORM – Májilis depýtaty Dáýlet Muqaev jastardy qoljetimdi baspanamen qamtý máselesin kóterdi.

«Úkimet tarapynan jastarǵa tıisti deńgeıde kóńil bólinip jatyr ma? Eń basty qajettilik baspana máselesi de sheshimin tappaı otyr. Jyry basylmaǵan jastarǵa berilgen jaldamaly páter jaıynda Roman Vasılevıchke de depýtattyq saýal joldaǵanmyn. «Jastardy turǵyn úımen qamtamasyz etý máselesi Úkimettiń baqylaýynda» dep qysqa qaıyrǵan. Jastardyń talap-tilegin naqty sheshimder men áreketter jasaıdy degen nıetpen qaıta joldap otyrmyn», - dedi Dáýlet Muqaev Májilis otyrysynda depýtattyq saýal joldap.

Halyq qalaýlysynyń málimetinshe, 2019 jyldan beri Astana, Almaty, Shymkent qalalarynda jaldamaly páterde turyp jatqan jastardyń sany 10 000-ǵa jýyqtaǵan. 2019 jyly baspana alǵan jastardyń baspanany bosatýyna da az ýaqyt qaldy.

Onyń aıtýynsha, megapolısterdegi jastardyń dalada qalý qaýpi joǵary. Ótken jyly berilý kerek páterler Almaty qalasynyń jastaryna áli der berilmedi, naqty tizim, nátıje shyqpady. Odan ári D.Muqaev jaldamaly páter alǵan jastardyń qarjy jınap, baspana ala almaý sebebin atady.

«2019 jyldan beri ınflıatsııa deńgeıi de sharyqtap, úı baǵasy jyldan-jylǵa ósti. Osydan 5 jyl buryn respýblıka boıynsha páterdiń ortasha sharshy metri 200 myń bolsa, qazir 400 myńǵa jýyqtady, 2 ese ósti. Shyndyqqa týra qarasaq, baspanaǵa qarjy jınaýdan, qymbatshylyq qyspaqqa alyp kúnkóris máseleli aldyńǵy orynǵa shyqty, bul – bir. Ekinshiden, elde jastarǵa arnalǵan tıimdi memlekettik baǵdarlama joq. Elde tıimdi baǵdarlamanyń joqtyǵynan jastar baspana alý úshin shetel asyp jumys isteýge májbúr. Kelmeı qalyp qoıyp jatqany qanshama. Bul elimizde daryndy, talantty jastardyń azaıýyna alyp kelýde. Úshinshiden, jaldamaly páter alǵan jastar ózge de memlekettik baǵdarlamalar men úı kezeginde turý múmkindiginen aıyrylǵan. Aqshasyn jınap, túıip otyrǵan jastar, basqa baǵdarlamaǵa qatysa almasa qalaı baspanaly bolmaq», - deıdi ol.

Depýtat joǵarydy atalǵan faktorlardy eskere otyryp, jastardyń tıimdi baspana alýyna jaǵdaı jasaý jáne kemi 10%-dyq bastapqy jarnamen ózderi turyp jatqan baspanasyn satyp alýǵa múmkindik berý máselesin qarastyrýdy qaıta surady.

«Paıyzdyq mólsherlemesi de 5%-dan aspaýy tıis nemese jaldamaly páterde turý merzimin uzartý kerek», - deıdi Dáýlet Muqaev.