Jastar arasyndaǵy Álem chempıonatynda qazaqstandyq aýyr atletter qorjyny ekinshi qola medalmen tolyqty
ALMATY. 18 mamyr. QazAqparat -Gvatemalanyń Antıgýa qalasynda aýyr atletıkadan 20 jasqa deıingi jastar arasyndaǵy Álem chempıonatynda Jasulan Qydyrbaev (94 kg) qola júldeger atandy.
Ol serpe kóterýde 165 kelini baǵyndyryp kishi qola medaldi ıelendi. Sondaı-aq julqa kóterýde 198 kelini kóterip, qossaıystyń qorytyndysy boıynsha (363 kg) Álem chempıonatynyń qola júldegeri atandy. Onda 393 kelini (178+215) kótergen ırandyq Saıd Mohammadpýr Karkarash altyn, al reseılik Egor Klımonov 385 kelimen (170+215) kúmis medal ıelendi.
10 mamyrda jalaýy kóterilgen bul dúbirli dodada buǵan deıin 69 kelide baq synaǵan Jazıra Japarqul 239 (106+133) kelilik ziltemirdi kóterip qazaq qyzdary arasynan tuńǵysh Álem chempıony atanǵan edi. Al onyń 63 kelide óner kórsetken komandalas serigi Karına Gorıcheva 225 kelini baǵyndyryp (100+125) el qorjynyna alǵashqy qola júldeni salǵan bolatyn. Endi onyń qatary bir úlken, bir kishi eki qola medalmen tolyǵyp otyr.
Dúnıejúziniń 52 elinen erler arasynda 250, qyzdar arasynda 190 atlet qatysqan bul baıraqty básekede bapkerler el namysyn qorǵaýdy erler arasynda - 2, qyzdar arasynda - 2 sportshyǵa senip tapsyrǵan bolatyn. Búgin el qorjyny taǵy bir medalmen tolyǵyp qalýy múmkin.
