Jastar arasynda jumyssyzdyq 3,9 paıyzǵa qysqardy
ASTANA. QazAqparat - Qazaqstanda jastar arasyndaǵy jumyssyzdyq deńgeıi 3,9 paıyzǵa qysqardy. Bul 82 myń jas jumyssyz degen sóz, dep habarlaıdy QazAqparat Finprom.kz saıtyna silteme jasap.
Jastar arasyndaǵy jumyssyzdyqtyń qysqarýyna jaldamaly jumysshylar sanynyń 3,1 paıyzǵa ósip, 1,5-ten 1 mln 600 adamǵa artýymen baılanysty. Ózin ózi jumyspen qamtyǵandar sany 7,9 paıyzǵa qysqaryp, 455 myń adamdy qurady.
Jumys kúshi sany ózgermedi desek te bolady. Degenmen, 0,2 paıyzǵa kóbeıip otyr. Al jumyspen qamtylǵan halyq sany 0,4 paıyzǵa nemese 8600 adamǵa artty.
Jumysshy kúshi quramyna kirmeıtin tulǵalar sany 3,5 paıyzǵa, 1,36 mln adamǵa qysqardy. 2012-2017 jyldary kezeńinde 15-28 jas aralyǵyndaǵy jumyssyz halyq sany 5,4-ten 3,9 paıyzǵa deıin azaıdy.
2018 jyldyń eki toqsanynyń qorytyndysy boıynsha elimizdiń jastary ishinen 82 myń adam jumyssyz júr. Bul ótken jyldyń sáıkes kezeńimen salystyrǵanda 4,8 paıyzǵa az. Ótken jyldyń eki toqsanynda elimizde 86 myń jas jumyssyz júrgen edi.
Jumyssyz jastardyń basym bóligi Almaty qalasynda - 15 500 adam. Bul 15-28 jas aralyǵynda jumyssyz halyqtyń 18,8 paıyzyn quraıdy.
Odan keıingi orynda Túrkistan oblysy tur. Bul óńirde jumssyz retinde 8 700 adam tirkelgen. 7200 jumyssyz jasy bar Qaraǵandy oblysy úshinshi orynǵa jaıǵasqan. Jumyssyz jastary az óńir Soltústik Qazaqstan oblysy sanalady. Bul óńirde turaqty jumysqa ornalaspaǵan 1500 adam bar.
Jalpy elimizdiń jastarynyń kóterme jáne bólshek saýda, avtomobıl men mototsıkl jóndeý salalaryna qyzyǵýshylyǵy basym. Atalǵan salalarda elimizde jumys isteıtin jastardyń 16,5 paıyzy, nemese 335 myń jumys istep, nápaqa taýyp júr.
Jastar arasynda tanymaldyqqa aýyl, orman jáne balyq sharýashylyǵy ıe. Bul salalarda 276 myń jas jumys isteıdi.
Bilim salasynda jumys isteıtin jastardyń sany 229 myń adamdy qurasa, ónerkásipte 221 jas eńbek etip júr. Sonymen qatar qurylys salasynda jumys isteıtin jastardyń da qarasy qalyń. Bul salada 149 myń adamnyń eńbek etetindigi belgili.
