Jastar arasyndaǵy jumyssyzdyq máselesi qalaı sheshilip jatyr
ASTANA. KAZINFORM – Jylda eńbek naryǵyna 250 myńǵa tarta jas maman keledi. Bul týraly QR Eńbek jáne halyqty áleýmettik qorǵaý mınıstriligi málim etti.
«Qazaqstanda halyqtyń 27 paıyzyn jastar qurap otyr (5,3 mln adam). Jyl saıyn eńbek naryǵyna shamamen 200-250 myń jas maman shyǵady. Kásibı bilimi bolǵanyna qaramastan, olardyń barlyǵy birdeı mamandyqtary boıynsha jumys taba bermeıdi nemese jetkilikti jumys tájirıbesi joq. Bul jaǵdaı olardyń jumysqa ornalasýyn qıyndatady. Biz jastardyń ıkemdi jumys túrlerine umtylysyn baıqaımyz. Jastardyń jaldamaly jumystaǵy úlesi tómendep, sáıkesinshe frılanserler sany ósýde, olardyń ishinde joǵary bilimi barlar da bar. Birinshi mindet – kásibı baǵdar berý jumysy. Biz «Mansap kompasy» jobasyn iske asyrdyq, ol mansap jolyn qurýǵa, bos jumys oryndaryn tez tabýǵa, jalaqylar men talaptardy salystyrýǵa, sondaı-aq suranysy bar mamandyqtar, boljamdar jáne oqý oryndary týraly aqparat alýǵa kómektesedi», - delingen Eńbek mınıstrliginiń Kazinform agenttigine bergen jaýabynda.
Vedomstvo aqparatyna qaraǵanda, stýdentterdiń mamandyq boıynsha tájirıbesin shyńdaý úshin Elektrondyq eńbek bırjasynda óndiristik praktıka fýnktsıonaly iske qosyldy, ol naqty baǵyttardy meńgerýge jáne básekege qabilettilikti arttyrýǵa kómektesedi.
«Jastar jumyssyzdyǵy máselesin sheshý úshin Qazaqstanda jumysqa ornalastyrýdyń belsendi is-sharalary da júzege asyrylyp jatyr. 2024 jylǵy 1 qazanyndaǵy jaǵdaı boıynsha aımaqtyq jumyspen qamtý organy sanalatyn mansap ortalyqtaryna 376 myń adam júgindi, olardyń 226 myńy túrli memlekettik qoldaý túrlerin aldy (onyń ishinde jastardyń úlesi - 180 myń adam). Jumys berýshilerdiń suranysy boıynsha oqý uıymdarynda kásibı oqytý aıasynda 2,6 myń adam oqýdan ótti, olardyń 1,5 myńy oqýdy aıaqtap, 1,2 myńy jumysqa ornalastyryldy. Sonymen qatar, Eńbek resýrstaryn damytýda búkil halyq úshin oqytýdyń tsıfrlyq nysandaryna basa nazar aýdaryldy. 2021 jyldyń shildesinen bastap eńbek naryǵynda suranysy bar baǵyttar boıynsha onlaın rejımde qysqa merzimdi oqytýdyń biryńǵaı portaly iske qosyldy (https://skills.enbek.kz)», - dep atalyp ótken mınıstrlik aqparatynda.
Skills.Enbek platformasynda – TjKB uıymdary men joǵary oqý oryndaryna mıkrokvalıfıkatsııalardy taný jáne WorldSkills alańdaryn damytý úshin kýrstardy ornalastyrý múmkindigi berilip otyr.
«Qazir bul portalda 364 daǵdy boıynsha 141 avtordan 615 onlaın kýrs ornalastyrylǵan, onyń 278-i halyq úshin tegin. Odan bólek, jumys berýshilerdiń jumys ornynda kásibı oqytýyna 653 adam qatysty, oqýdy aıaqtaǵannan keıin 385 adam jumysqa ornalastyryldy. 3,5 myń jas óz bıznesin damytý úshin grant aldy. Jumyspen qamtýǵa járdemdesý arqyly 106 myń adam jumys taýyp, bos jumys oryndaryna ornalasty. Áleýmettik jumys oryndary baǵdarlamalaryna 5 myń adam, jastar praktıkasyna – 1,8 myń adam, qoǵamdyq jumystarǵa – 27 myń adam qatysty. Bul is-sharalar jastarǵa alǵashqy jumys tájirıbesin alýǵa jáne eńbek naryǵyna beıimdelýge kómektesedi, olardyń el ekonomıkasyna ıntegratsııalanýyna yqpal etedi», - delingen mınıstrlik habarlamasynda.
Bulan buryn habarlanǵandaı, Eńbek jáne halyqty áleýmettik qorǵaý mınıstriligi bıyl shamamen 1 mln adamdy jumysqa ornalastyrý mindeti qanshalyqty oryndalyp jatqany jaıynda túsinik berdi.
