Jastar arasyndaǵy Azııa chempıonaty: Qazaqstan boksshylarynyń daıyndyǵy qandaı
ASTANA. KAZINFORM - Bokstan 30 shilde men 12 tamyz aralyǵynda Bangkok (Taıland) qalasynda World Boxing uıymdastyrýymen jastar arasyndaǵy Azııa chempıonaty ótpek. Atalmysh jarysqa Qazaqstan quramasy da qatysady. Al básekelestik deńgeıdi óte joǵary bolmaq. Osyǵan oraı Olympic.kz boksshylardyń daıyndyǵy týraly aqparat usyndy.
Jýyrda Taıland astanasy Bangkokta bokstan jastar arasyndaǵy Azııa chempıonaty ótedi. Bul – World Boxing federatsııasynyń uıymdastyrýymen ótetin alǵashqy qurlyq birinshiligi. Sonymen qatar atalǵan dodaǵa 25 eldiń bylǵary qolǵap sheberleri qatysady dep josparlanǵan.
Qazaqstan jastar quramasy sońǵy daıyndyq kezeńi Qyrǵyzstan elinde ótip jatyr. Ulttyq qurama boksshylaryn Baqyt Sársekbaev jattyqtyryp jatyr.
- Biz Ystyqkólde oqý-jattyǵý jıyndaryn ótkizdik. Jıyn barysynda fızıkalyq jáne tehnıkalyq daıyndyqqa erekshe kóńil bólindi. Sonymen qatar Qyrǵyzstan ulttyq quramasymen birlesip qarqyndy jattyǵý jumystary júrgizilip, birqatar jattyǵý jekpe-jekteri ótkizildi, - dedi Baqyt Sársekbaev.
Qazirgi Qazaqstan jastar quramasyna zer salsaq, birqatar ózgeristiń bolǵanyn kóremiz. Sebebi ár daıyndyqtyń nátıjesinde irikteý jumystary júrgizildi. Qurlyq birinshiligine attanatyn tolyq erler quramy tómendegideı:
50 keli: Nurzat Ońǵarov
55 keli: Beksultan Boranbek
60 keli: Nurıslam Qaldybaev
65 keli: Ilıa Kalının
70 keli: Nurbek Mursal
75 keli: Aman Qonysbekov
80 keli: Sanjaráli Begalıev
85 keli: Azatbek Joldashan
90 keli: Temirlan Muqataev
90 keliden joǵary: Nurasyl Asylhan
Quramda Sanjaráli Begalıev, Beksultan Boranbek (ekeýide jastar arasynda 2024 jylǵy álem chempıony) jáne Nurzat Ońǵarov syndy daryndy boksshylardy baıqaýǵa bolady. Atalǵan sportshylar buǵan deıin ótken birneshe halyqaralyq jarystarǵa qatysyp, joǵary deńgeıde óner kórsetip júr.
Sonymen qatar buǵan deıin Shrı-Lankada ótken Azııa chempıonatynda jeńiske jetken Nurıslam Qaldybaev (60 kelige deıin), Aman Qonysbekov (75 kelige deıin) jáne Azatbek Joldashan (85 kelige deıin) bar. Bul boksshylardan da joǵary nátıje kútýge bolady.
Jalpy alǵanda ulttyq quram kil myqtylarmen jasaqtaldy. Bul degenimiz ár sportshyǵa artylatyn mindetterdiń de kóp bolatynyn bildiredi.
Odan bólek jastar quramasynyń bas bapkeri Baqyt Sársekbaev irikteý jumystary qalaı ótkenin jáne aldaǵy jospary týraly aıtyp berdi.
- Ár salmaqta ótken jattyǵý jekpe-jekteriniń nátıjesinde eń úzdik sportshylar irikteldi. Іriktelgen boksshylardyń barlyǵy Taılandqa barady. Al Azııa chempıonatynan keıin qalypqa kelý jumystaryn júrgizýdi josparlap otyrmyz. Aldaǵy jarystan úlken nátıje kútemiz. Sebebi týrnırde básekelestik deńgeıiniń joǵary bolatynyn bilip otyrmyz, - deıdi bapker.
Taıland astanasy Bangkok qalasynda bokstan World Boxing uıymynyń U19 jáne U22 jas sanattary boıynsha alǵashqy Azııa chempıonaty ótetinin jazǵan bolatynbyz.