Jastar áleýmettik taqyryptarda kıno túsirýge beıim - synshy
ALMATY. QazAqparat - Qazaqstannyń jas kınematograftary elimizdiń áleýmettik salasy men otbasy máselesine, jetimder taǵdyryna arnalǵan kınolar túsirýge den qoıǵan, dedi ІІ respýblıkalyq «Baıqońyr» qysqametrajdy kınofestıvaliniń irikteý komıssııasynyń múshesi Erjan Jumabekov QazAqparat tilshisiniń saýalyna jaýap berý kezinde.
Bıyl ekinshi ret uıymdastyrylyp otyrǵan respýblıkalyq «Baıqońyr» qysqametrajdy kınofestıvali 15-16 qyrkúıek kúnderi Kóktóbe saıabaǵynda ótedi. Uıymdastyrýshylardyń aıtýynsha, bıyl festıvalge qatysýǵa 140 ótinish kelip túsken, onyń ishinen 35 fılm iriktelip alynǵan. Sondaı-aq baıqaýdan tys baǵdarlamaǵa 3 kartına qatysady. Bıylǵy jyly «Úzdik qoıýshy-sýretshi» atty jańa nomınatsııa qosylyp otyr. Endi qatysýshylar «Baıqońyrdyń» 11 músinshesine talasatyn bolady. Kıno synshy Erjan Jumabekovtiń aıtýnysha, búgingi jas kınotúsirýshiler áleýmettik salaǵa mán bergen.
«Kınfestıvaldiń ereksheligi qysqametrajdy fılmderdiń áleýmettik mańyzdylyǵyn arttyryp otyr. Festıvaldi eki anımatsııalyq fılmmen ashamyz. Jastar qoǵamdaǵy áleýmettik máselelerge nazar aýdarǵan. Sonyń ishinde, otbasy, tastandy balalar, jetimder máselesi. Keıipkerdiń qoǵamda óz ornyn izdeý máselesi jastardyń nazarynda», - dedi Erjan Jumabekov.
Festıvaldiń qazylar alqasynda Qazaqstan kınematografıster odaǵynyń tóraǵasy ári rejısser Ahat Ybyraev, qazylar alqasynyń múshesi - aktrısa Gúlnar Dosmatova, kınosynshy Erjan Jumabekov bar.
Sondaı-aq qazylar alqasynyń quramyna operator Azamat Dýlatov, «Debıýt» shyǵarmashylyq-óndiristik birlestiginiń jetekshisi Anar Qashaǵanova, rejısser, «Baıqońyr-2016» festıvaliniń jeńimpazy Sharıpa Orazbaeva, rejısser, stsenarıst Elıa Gılman, qoıýshy-sýretshi Ómirzaq Shmanov jáne kınosynshy Ǵalııa Baıjanova kirgen.
Kórsetilimderden bólek, kınofestıvalde aktrısa Qarlyǵash Muhamedjanovamen kezdesý ótedi. II Respýblıkalyq qysqametrajdy kınofestıvali aıasynda «Fılm 48 saǵattyń ishinde túsirildi - 2017» baıqaýynyń úzdik fılmderi kórsetilmek.
Uıymdastyrýshylardyń aıtýynsha, festıvalde iriktelip alynǵan fılmder «El arnada» kórsetiledi.
