Jastar ádemi sport túrimen aınalyssyn - SQO ákimi
PETROPAVL. QazAqparat - Soltústik Qazaqstan oblysynyń ákimi Qumar Aqsaqalov Imantaý-Shalqar kýrorttyq aımaǵynda demalys bazalaryn aralap, týrıstik sala kásipkerlerimen kezdesti, dep habarlaıdy QazAqparat tilshisi.
Óńir basshysy baspasóz qyzmetiniń aqparaty boıynsha, bıznesmender bıyl ashylatyn demalys bazalarynyń jańa jobalaryn tanystyrdy.
Jeke kásipker Janat Omar Imantaý kólinde jelkendi klýbtyń ashylatyny týraly aıtty.
«Qazir klýbta 3 jelken bar. Grant alýǵa ótinish berdik, taǵy bir jelken qajet. Jastar jelkendi sport túrine qyzyǵýshylyq tanytýda. Stýdentter shkıperdiń kýáligin alý úshin Túrkııaǵa baryp jatyr», - dedi J. Omar.
Qumar Aqsaqalov jas kásipkerdiń jáne kásibı shkıperdiń bastamasyn qoldady. Óńir basshysy Petropavldaǵy Pestroe kólinde jelkendi sportty damytýdy usyndy.
«Ol jaqta únemi jel soǵyp turady. Siz «Bıznestiń jol kartasy - 2020» baǵdarlamasy boıynsha grant ala alasyz. Bul qarjyǵa jańa jelkender satyp alasyz. Qazir Pestroe kólindegi jaǵajaı abattandyrylýda. Sonda jelkenderdi jiberińiz. Jastar ádemi sport túrimen aınalyssyn», - dedi Qumar Aqsaqalov.
