«Jasotandyqtar» Tarbaǵataı aýdanyna gýmanıtarlyq zattar jiberýde

dep habarlaıdy QazAqparat.

«Tarbaǵataı muńy - búkil Qazaqstannyń muńy» atty gýmanıtarlyq aktsııasy aıasynda «Nur Otan» HDP-niń «Jas Otan» jastar qanatynyń oblystyq, Almaty jáne Astana qalalaryndaǵy fılıaldary jurtshylyqtan gýmanıtarlyq zattar jınaý úshin beketter ashty. Onda qala turǵyndarynan kıim-keshek, dári-dármek, azyq-túlik qabyldanýda. Osyndaı beketter Astana qalasynda «Saryarqa», «Mega» jáne «Kerýen» saýda ortalyqtarynda uıymdastyryldy.

«Sáýirdiń 2-si kúni Qaraǵandy qalasynyń fılıaly birinshi bolyp gýmanıtarlyq júk jóneltti. Osy aıdyń 9-y kúni atalmysh aýdanǵa Taraz qalasynan azyq-túlik, kıimder men dári-dármek tıelgen «Gazel» avtokóligi barady. Óz járdemderi men nıetterin kórsetip, eldigimizdi, Qazaqstan eliniń jomarttyǵyn baıqatyp jatqan azamattarǵa alǵys aıtamyn», deıdi «Jas Otan» JQ Atqarýshy hatshysy Nurlan Óteshev.

Onyń aıtýynsha, Qytaıda oqyp júrgen qazaq jastary da bul ıgi isten tys qalmaı, 14 qorap gýmanıtarlyq júkti ushaqpen jibergen.

Naýryzdyń 17-sinde kúnniń kúrt jylynýy jáne qardyń erýi saldarynan Tarbaǵataı aýdanynyń 20 shaqty eldi mekeni tasqyn sýdan zardap shekti. Ásirese, Kókjyra jáne Jantekeı aýyldarynyń jaǵdaıy aýyr. Tótenshe jaǵdaılar departamentiniń málimetteri boıynsha, tabıǵat apatynyń saldarynan aýdanda 500-deı úı qırap, 10 myń bastan astam mal (beıresmı málimetter boıynsha, 35 myńdaı) opat boldy. 7 myńnan astam adam qaýipsiz jerge kóshirildi.