«Jasotandyqtar» kóshedegi jarnamanyń qatelerin izdeıdi
ASTANA. QazAqparat - Búgin Astana qalalyq máslıxaty janyndaǵy qoǵamdyq keńestiń kezekti otyrysynda kóshedegi jarnama qateleri talqyǵa salyndy, dep xabarlaıdy QazAqparat tilshisi.
Búginde qala turǵyndary ondaı qatelerdi kórgende naqty qaı mekemege xabar berý kerek ekenin bilmeıdi. Keńes músheleri de kimge aryz túsirýge bolatynyn bilmeıtin bolyp shyqty. Osy oraıda «Nur Otan» partııasynyń Astana qalalyq fılıaly basshysynyń orynbasary Vladıslav Sergeev jasotandyqtardyń kómegine júginýdi usyndy. «Shyny kerek, kóshedegi jarnamalar qatelerin baqylaýdyń naqty bir mexanızmi kerek. Óıtkeni bizge, partııaǵa osy másele boıynsha aryzdanatyndar kóp. Baqylaýǵa adam jetispeı jatsa, biz ózimizdiń jastar qanatyn tartaıyq. Negizgi másele anyq, xalyq naqty qaı jerge shaǵymdanýdy bilmeıdi. Adamdar ákimdikke barady. Olar sáýlet jáne qala qurylysy basqarmasyna silteıdi. Basqarma til basqarmasyna jiberedi. Bir jer bolýy kerek. Aryz tústi me, úsh kúnde sheshiletindeı bolǵan jón», - dedi V.Sergeev.
Keńes tóraǵasy Sansyzbaı Esilov atalǵan usynysty birden qoldady. «Durys, biz de qoǵamdyq keńes bolyp atsalysaıyq. Osy mexanızmdi pysyqtaıyq. Bálkim, memorandýmǵa qol qoıamyz. Sosyn xalyqqa qulaqtandyrý jasaıyq, kóshedegi qateler boıynsha bizge, qoǵamdyq keńeske jazyńyz. Biz bolsaq, bárin tıisti organdarǵa jetkizemiz. Komıssııany quraıyq. Sol jerde tártip buzǵandardy jaýapqa tartaıyq. Bir-birimizge kómekteskenimiz durys qoı. Áıtpese, sáýletti qalany saldyq. Al jarnama jaǵy uıatqa qaldyryp otyr. Kenesary men Ýálıxanovtyń qıylysyndaǵy úılerdi aıtsaq ta, jetkilikti. Sumdyq qoı, tildik normalar da, estetıka da saqtalmaıdy. Kórgen adam kúledi», - dep atap kórsetti S.Esilov.
Osy oraıda ol sáýlet jáne qala qurylysy basqarmasynyń jetekshisi Baqtybaı Taıtalıevke eki aptanyń ishinde naqty usynystardy ázirleýdi tapsyrdy.
