«Jasotandyqtar» kitaphanalardy bilim berýdiń zamanaýı ortalyǵyna aınaldyrýdy usyndy
«Aldaǵy ýaqytta «jasotandyqtar» Memleket basshysynyń «Rýhanı jańǵyrý» baǵdarlamasyn júzege asyrýda budan da belsendi jumys atqarýy kerek. Qoǵamdyń sanany jańǵyrtýdyń basty maqsaty - bizdiń qoǵamdaǵy basty qundylyqtardy durys qalyptastyra bilý. Buǵan zańmen nemese qaýlymen ǵana qol jetkizý múmkin emes. Bul maqsatqa árbir jas qazaqstandyqty tárbıeleý baǵytyndaǵy kúndelikti belsendi jumyspen ǵana jetýge bolady. Memleket basshysynyń ıdeıasy álemge basqasha kózben qaraýǵa, óz-ózimizdi damytýǵa, jańasha oılaıtyn urpaq bolýǵa umtylýǵa shaqyrady. Árbir jas sheteldiń ozyq ónerin úırenýge talpynyp, bizdiń elimizdegi qundylyqtardy alǵa jyljytýdyń bas kúshterine aınalýy kerek», - dedi Áshimbaev «Jas Otan» Jastar qanatynyń kezekti IV seziniń qorytyndy kúninde uıymdastyrylǵan «Jańa álemge jol salamyz» Gala-forýmynda.
Onyń aıtýynsha, osyǵan baılanysty «Jas Otan» elimizdegi qundylyqtardy taratýǵa baǵyttalǵan birqatar áleýmettik jobalardy iske qosýy kerek.
«Atap aıtqanda, «Jas Otan kitaphana» jobasy boıynsha qazaqstandyq úzdik saıasatkerler men mınıstrler, depýtattar men sarapshylar aýdarýǵa keńes bergen ár túrli tilde shyqqan úzdik kitaptar qazaq tiline aýdarylyp, olar ashyq elektrondy túrde qoljetimdi bolady. Árbir jas óren osy kitaptarmen tanysa alady. Álemdik trendtegi kitaptardy turaqty túrde talqylaý júrgiziledi. Mine, osyndaı álemdik deńgeıdegi kitaptardyń avtorlarynyń bilimin «jasotandyqtar» boıyna sińirýi kerek», - dedi ol.
Máýlen Áshimbaev elimizdegi kitaphanalardy zamanaýı bilim berý ortalyǵyna, pikirtalastyrý alańyna, jaıly bilim aýmaǵyna, qyzyqty dárister men elektrondy kitaptardy oqýǵa, eń úzdik avtorlardyń kınolaryn kórýge bolatyndaı orynǵa aınaldyrý usynysy da mańyzdy ekenin aıtty.
«Demek, «Jas Otanda» bizdiń kitaphanalardy zamanaýı bilimdi taratý ortalyǵyna aınaldyrý ıdeıasy bar. Meniń oıymsha, sol jerde ǵalymdar jas órenderdi óziniń óner týyndylarymen tanystyra alar edi. Bizdiń kitaphanalardyń bazasynda mine, osyndaı ortalyqtardy qurýǵa bolady. Qanekeı, Sezd qorytyndysy boıynsha sol ıdeıany júzege asyrýǵa tyrysyp kórelik», - dedi Máýlen Áshimbaev.
