Jasóspirimge zorlyq-zombylyq jasady degen kúdikpen Qazaqstan azamaty Reseıden jetkizildi

ASTANA. KAZINFORM – QR Bas prokýratýrasy kámeletke tolmaǵanǵa qatysty seksýaldyq sıpattaǵy zorlyq-zombylyq áreketterin jasaǵany úshin qylmystyq jaýaptylyqqa tartý maqsatynda Qazaqstan azamatyn Reseı Federatsııasynan ekstradıtsııalady.

Tergeý málimetinshe, 2024 jyldyń qarashasynda Qostanaı oblysynda kúdikti ata-anasymen dostyq qarym-qatynastaǵy jasóspirimniń páterine kelgen. Jábirlenýshimen jalǵyz qalǵan kezde, onyń jasy men psıhıkalyq aýrýy týraly bile tura, er adam oǵan qatysty seksýaldyq sıpattaǵy zorlyq-zombylyq áreketterin jasaǵan.

- Qylmys jasaǵannan keıin kúdikti Qazaqstan aýmaǵynan shyǵyp ketken. Osyǵan baılanysty oǵan halyqaralyq izdeý jarııalanyp, ótken jyly Reseı Federatsııasynyń Chelıabi oblysynda ustaldy. Bas prokýratýranyń suraýy boıynsha Qazaqstanǵa ekstradıtsııalandy, - delingen baqylaýshy organnyń aqparatynda.

Qazirgi ýaqytta kúdikti tergeý ızolıatoryna qamaldy.

Aıyptalǵan is-áreket úshin belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyra otyryp, on bes jyldan on jeti jylǵa deıin bas bostandyǵynan aıyrý jazasy kózdelgen.

Aıta keteıik, qyz zorlap, 13 jyl jasyrynyp júrgen kúdikti Qyrǵyzstannan ekstradıtsııalandy.