Jasóspirimderge beımezgil ýaqytta qyzmet kórsetken kásipker aıyppul arqalady
ASTANA. KAZINFORM — Jambyl oblysynda túnde jasóspirimderge qyzmet kórsetkeni úshin dámhana ıesine aıyppul salyndy. Kásipker 129 750 teńge aıyppul tólep, tamaq jetkizý jáne alkogol ónimderin bólshek saýdada satý qyzmetin bir aıǵa toqtatty.
Merki aýdandyq sotynyń málimetinshe, 2026 jylǵy sáýirde Merki aýylyndaǵy kafelerdiń birinen túngi ýaqytta 15 jáne 17 jastaǵy eki jasóspirim anyqtalǵan. Olardyń janynda zańdy ókilderi bolmaǵan.
Іsti qaraý barysynda kafe ıesiniń osyǵan uqsas quqyqbuzýshylyǵy úshin naýryz aıynda da ákimshilik jaýapkershilikke tartylǵany belgili boldy. Alaıda bir aıdan keıin zań buzýshylyq qaıtalanǵan.
Kásipker hattamada kórsetilgen mán-jaılarǵa qarsylyq bildirmeı, kinásin moıyndady. Jasóspirimder de túnde ata-analarynsyz kafede bolǵanyn rastady.
Sot isti Ákimshilik quqyq buzýshylyq týraly kodekstiń 132-babynyń 2-bóligi boıynsha qarady. Bul norma zańdy ókilderinsiz kámeletke tolmaǵandardy túngi ýaqytta oıyn-saýyq oryndaryna qaıta kirgizgeni úshin jaýapkershilikti kózdeıdi.
Sot kináni moıyndaýdy jeńildetetin mán-jaı retinde eskerdi. Al jaýaptylyqty aýyrlatatyn mán-jaılar anyqtalǵan joq.
Kásipkerge 30 AEK, ıaǵnı 129 750 teńge aıyppul salyndy. Sonymen qatar sot onyń tamaq jetkizý jáne alkogol ónimderin bólshek saýdada satý qyzmetin bir aıǵa toqtatty.
Sot qaýlysy zańdy kúshine endi.
Aıta keteıik, bıyl Petropavlda 9 jasóspirim arnaıy mekemege oqýǵa jiberildi.
