Jasóspirimderdiń áleýmettik jelige tirkelýin shekteý: Qazaqstan qaı elderdiń tájirıbesine arqa súıep otyr
ASTANA. KAZINFORM – Qazaqstanda 16 jasqa deıingi jasóspirimderdiń áleýmettik jelilerde tirkelýine qatysty ázirlenip jatqan zań jobasynda birneshe eldiń tájirıbesi eskerilip jatyr. Bul týraly QR Mádenıet jáne aqparat mınıstrligi Kazinform agenttiginiń resmı saýalyna bergen jaýabynda aıtty.
– Aýstralııada kámeletke tolmaǵandardyń áleýmettik jelilerge qol jetkizýin shekteýge baǵyttalǵan sharalar zańnamalyq deńgeıde iske asyrylyp jatyr. Mundaı shekteý Indonezııada, Túrkııada jáne Birikken Arab Ámirlikterinde de engizilgen. Frantsııada osyǵan uqsas zań jobasy áli kelisilip jatyr, al Ispanııa, Danııa jáne Ulybrıtanııada osyndaı bastamalar talqylaný ústinde. Atalǵan elderdiń tájirıbesi ulttyq zańnamanyń erekshelikterin, tsıfrlyq damý deńgeıin jáne qoldanylatyn tehnologııalyq sheshimderdi eskere otyryp zerdelenedi, – dep habarlady Mádenıet jáne aqparat mınıstrligi.
Vedomstvonyń aıtýynsha, halyqaralyq tájirıbe Qazaqstandaǵy quqyqtyq jáne tehnologııalyq múmkindikterdi eskere otyryp qarastyrylady.
Aıta keteıik, qazir Úkimettiń qaraýynda jatqan zań jobasynda jedel habar almasý servısterin qospaǵanda, 16 jasqa deıingi paıdalanýshylardy onlaın-platformalarda tirkeýge tyıym salý kózdelgen.
Buǵan deıin Ulybrıtanııada 16 jasqa tolmaǵandarǵa Snapchat, TikTok, YouTube, Instagram, Facebook jáne X sııaqty platformalarǵa kirýge tyıym salynatyny jaıly jazdyq. Shekteý 2027 jyldyń kókteminde kúshine enedi dep josparlanyp otyr.
Al 1 maýsymda Malaızııada 16 jasqa tolmaǵan balalarǵa jeke áleýmettik medıa akkaýnttaryn ashýǵa tyıym salatyn jańa ereje kúshine engen bolatyn.
