Jasóspirimderdiń 85%-y óz ómirine qanaǵattanady, quqyqtyq qorǵalý deńgeıi 90%-dan joǵary

ASTANA. KAZINFORM — Elimizde Balalardyń ál-aýqaty ındeksiniń qorytyndylary aıasynda aýqymdy áleýmettik zertteý júrgizildi. Saýalnamaǵa balalar, ata-analar jáne pedagogter qatysty. Bul týraly Oqý-aǵartý mınıstrliginiń baspasóz qyzmeti habarlady. 

Zertteý nátıjelerine sáıkes, balalardyń quqyqtyq qorǵalýynyń ortasha deńgeıi 90,3%. Bul olardyń óz quqyqtary týraly habardarlyǵy joǵary ekenin jáne ózderin qorǵaý tetikterin qoldana alatynyn kórsetedi.

Aldyńǵy qatardan Qostanaı oblysy (94,5%), Mańǵystaý oblysy (93,5%) jáne Qyzylorda oblysy (93,1%) kórindi.

Mańyzdy kórsetkishterdiń biri — jasóspirimderdiń óz ómirine qanaǵattaný deńgeıi. Orta eseppen 10–18 jastaǵy balalardyń 85%-y óziniń áleýmettik jáne psıhologııalyq jaǵdaıyn oń baǵalaǵan. Bul baǵytta eń joǵary nátıje Qostanaı oblysynda (90,1%), Shymkent qalasynda (88,7%) jáne Qyzylorda oblysynda (88,5%) tirkeldi.

Zertteý barysynda otbasy ishindegi senim deńgeıine erekshe kóńil bólindi. Nátıjesinde jasóspirimderdiń 90,4%-y ata-anasymen ashyq sóılesip, oı-pikirin bólise alatynyn kórsetti. Eń joǵary kórsetkishter Ulytaý oblysynda (97,5%), Astana qalasynda (95,3%) jáne Qostanaı oblysynda (94,7%) baıqaldy.

— Balalar ál-aýqaty ındeksi — balanyń densaýlyǵy, bilimi, otbasy jáne áleýmettik ortasyn qamtıtyn mańyzdy kórsetkish. Bizdiń maqsatymyz — eń aldymen balalardyń óz únin estý. Zertteý nátıjeleri olardyń ózderin qaýipsiz sezinetinin, ata-anasymen jaqsy qarym-qatynasyn jáne bolashaǵyna senimmen qaraıtynyn kórsetip otyr, — dedi Oqý-aǵartý mınıstrligi Balalardyń quqyqtaryn qorǵaý komıtetiniń tóraıymy Nasymjan Ospanova.

Aıta keteıik, 2024 jyldyń qorytyndysy boıynsha Qazaqstanda Balalardyń ál-aýqaty ındeksi turaqty ósim kórsetip, ortasha respýblıkalyq kórsetkish 2,5 pýnktke artyp, 58,6 ball boldy. 

Aıta ketelik otbasylardyń ál-aýqat deńgeıin anyqtaýdyń baldyq modeli engizilmek.