Jasóspirimderdiń 10-12 paıyzy beıtanys adammen kezdesýge barǵan — zertteý

ASTANA. KAZINFORM — Elimizde balalar men jasóspirimder arasynda LGBT nasıhatyna qatysty zertteý men saýalnama júrgizildi.

Onyń nátıjesimen Oqý-aǵartý mınıstrligi balalardyń quqyǵyn qorǵaý komıtetiniń tóraǵasy Nasymjan Ospanova bólisti.

— Balalardyń 4,2 paıyzy eresektermen bir nemese eki ret sóıleskenin aıtqan, ıaǵnı múlde tanymaıtyn adamdarmen sóılesken. Árbir onynshy bala ınternette ózin jáne qatarlastaryn mazalaıtyn, alańdatatyn nárse bar ekenimen tolyq kelisedi. Balalardyń 11,1 paıyzy fotosyn nemese vıdeosyn tanymaıtyn adamǵa jibergen. Sonymen qatar balalardyń tórtten biri jaǵymsyz tájirıbesi týraly eshkimge aıtpaǵan, — dedi Nasymjan Ospanova.

Komıtet basshysynyń málimdeýinshe, er balalardyń 12 paıyzy, al qyzdardyń 10 paıyzy ınternette tanysqan beıtanys adammen kezdesýge barǵanyn moıyndaǵan.

— Zertteý nátıjesi balalardyń aıtarlyqtaı qaýip-qaterge ushyraý deńgeıinde ekenin kórsetip otyr. Balanyń tolyq qalyptasyp úlgermegen álsiz psıhıkasy aqparattyq shabýylǵa tótep bere almaıdy, — deıdi ol.

Aıta keteıik, búgin elordada LGBT nasıhattyń balalar men jasóspirimderge áserin zertteý nátıjesi talqylandy. Atalǵan sharaǵa sarapshylar, ǵalymdar, memlekettik organdar ókilderi, depýtattar men qoǵamdyq uıymdar ókilderi qatysty. 

Buǵan deıin Qazaqstanda LGBT nasıhatqa qylmystyq jaýapkershilik engizý usynysy týraly jazǵan edik. 

Sondaı-aq Májilis depýtaty Edil Jańbyrshın LGBT nasıhattyń 73 paıyzy áleýmettik jeliden tarap jatqanyn aıtyp, dabyl qaqty. 

Eske salaıyq, saýalnama nátıjesine sáıkes, qazaqstandyqtardyń 80 paıyzy LGBT nasıhatty zańmen shekteýdi qoldaıdy.