Jasóspirimderdi jynystyq saýdaǵa tartqan: Van Damm ózine qatysty aıyptaýlarǵa jaýap berdi

ASTANA. KAZINFORM – Akter Jan-Klod Van Dammǵa «kámeletke tolmaǵan jasóspirimderdi jynystyq saýdaǵa tartty» degen aıyp taǵyldy. Atalǵan jaǵdaı boıynsha akterdiń ókili People basylymyna túsinikteme berdi.

Aıyptaýda 64 jastaǵy Van Dammǵa 10 jyl buryn Kann qalasynda bes model qyz jynystyq qyzmet kórsetý maqsatynda jiberilgeni aıtylǵan. Olardyń keıbiri sol kezde kámelet jasyna tolmaǵan bolýy múmkin. Bul isti Rýmynııa prokýratýrasy tergep jatyr, sebebi modelder – osy eldiń azamatshalary.

– Biz bul aıyptaý týraly BAQ-tarda taraǵan maqalalardan habar taptyq. Keltirilgen derekter shyndyqqa janaspaıdy. Van Damm myrzanyń bul qaýesetke qatysty pikir qosyp, ony odan ári órshitý nıeti joq. Óıtkeni bul – eshqandaı negizi joq áńgime, – deıdi akterdiń ókili.

Іs Rýmynııanyń uıymdasqan qylmystardy tergeý basqarmasy tarapynan tekserilip jatyr. 

Tergeý eldegi modeldik agenttiktiń ıesi ári kásipker Morel Bolıaǵa qatysty bastalǵan. Ol 2020 jyly tutqyndalǵan jáne kámelet jasqa tolmaǵan model qyzdardy jynystyq qyzmet kórsetýge tartqan qylmystyq top qurdy dep aıyptaldy.

Tergeý kezinde kýáger qyzdardyń biri Van Dammnyń esimin ataǵan.

– Men jańa ǵana agenttikke qosylǵan shaǵym edi. Olar Rýmynııada da, shetelde de kóptegen sharalar uıymdastyryp júrdi. Sol kezde Kannda basty rólde Van Damm oınaǵan fılmniń tusaýkeseri ótti. Sharadan keıin bes qyz Van Dammmen birge bolý úshin jiberildi. Bul oqıǵany bizdiń uıymdaǵy basqa qyzdar da aıtyp berdi, – dep keltiredi Antena 3 telearnasy kýágerdiń sózin.

Qosa keteıik, Van Damm bes ret úılengen. Úsh balanyń ákesi. Segiz jyl buryn onyń uly esirtki saqtaǵany jáne qarýly shabýyl jasaǵany úshin ustalǵan.

Buǵan deıin úndistandyq kınorejısser Soham Shah Ońtústik Koreıanyń «Kalmar oıyny» telehıkaıasy onyń «Fortýna» úndi fılminiń plagıaty ekenin aıtyp, Netflix strımıngtik platformasyn sotqa bergeni týraly jazǵan edik.