Jasóspirimder otbasyndaǵy urys-keris, jaýapsyz mahabbattan sýıtsıdke barady – sýıtsıdolog

  Aqtóbe oblysy boıynsha bıyl 3 jasóspirim óz-ózine qol saldy. Taǵy 10 jasóspirimdi mamandar aman alyp qaldy, dep habarlaıdy Kazinform.

Aqtóbe oblysy boıynsha jasóspirimder arasynda sýıtsıd azaıǵanymen, múlde toqtady dep aıtýǵa bolmaıdy. Qazirgi kezde ata-ana arasyndaǵy daý, urys-keris pen ınternetke táýeldilik jasóspirimderdiń óz-ózine qol salýyna ákep soǵyp tur.

- Jasóspirimder arasyndaǵy sýıtsıdtiń erekshe baqylaýda bolatyny belgili. Bıyl úsh jasóspirim óz-ózine qol jumsap, ómirimen qoshtasty. Olardyń jasy 16-ǵa tolmaǵan. Sonymen birge kámelet jasqa tolmaǵan 10 bala ómirimen qoshtasýǵa oqtaldy. Bala statsıonarǵa jatqyzylsa, birden mobıldi top barady. Olar: balalar psıhıatri jáne bas sýıtsıdolog-psıholog. Mamandar aldymen sebebin anyqtaıdy. Psıhıkalyq aýytqýy bar-joǵy tekseriledi. Sonymen birge sol kúni-aq bala oqıtyn bilim ordasyna, prokýratýra, polıtsııaǵa habar beriledi. Bala, onyń jan-jaǵyndaǵy adamdar jyl boıy psıholog, pedagog, áleýmettik qyzmetkerdiń baqylaýynda bolady. Jasóspirim shaqta balalar otbasyndaǵy urys-keris, jaýapsyz mahabbattan sýıtsıdke barady. Eresekter úshin usaq-túıek bolǵanymen, bul balalarǵa úlken qasiret, - dedi sýıtsıdolog Svetlana Posholchenko.

Onyń aıtýynsha, keıde balalar 13 jasynda shızofrenııa dertine shaldyǵyp jatady. Bul ata-ana men bala arasyndaǵy qarym-qatynastyń ajyrap ketkenin, otbasynda baılanystyń joq ekenin bildiredi.

- Byltyrǵyǵa qaraǵanda bıyl jasóspirimder arasynda sýıtsıd azaıdy. Biraq eresekter arasynda jıi tirkelip jatyr. Jumysynan aıyrylý, ótelmegen nesıe, otbasyndaǵy kıkiljiń jáne qumar oıynǵa salyný sebepteri aldyńǵy orynda. Adamdar psıholog, psıhıatrǵa barýdan qashqaqtaıdy. Bul durys emes. Ýaqytyly kómek surasa adamdar munyń báriniń aldyn ala alady. Salaýatty ómir saltyn ustaný, jaman ádetten aýlaq bolý, sportpen shuǵyldaný mańyzdy. Sonymen birge kópshilik arasyna shyǵyp, oı bólý kerek. Koronavırýs ınfektsııasy kezinde adamdar úıde otyryp, kúızeliske tústi. Qazir de adamdar bir-birimen sóılespeıdi, áńgimelespeıdi. Telefon arqyly baılanysý da durys emes. Adamdar sóılesse ǵana bar muńyn jaqynyna aıtyp, qaıǵyly jaǵdaıdyń aldyn alýǵa bolady. Sher tarqatqan jón,- dedi sýıtsıdolog Svetlana Posholchenko.