Senegalda 2026 jylǵy oıyndarǵa keri sanaq bastaldy
ASTANA. KAZINFORM – 31 qazanda Senegaldyń astanasy Dakarda 2026 jylǵy jasóspirimder Olımpıadasyna deıin bir jyl qalǵanyn atap ótetin merekelik is-sharalar bastaldy. Bul týraly QR Ulttyq olımpıadalyq komıteti habarlady.
Negizgi oqıǵalar Dakar-2026 oıyndarynyń tumaryn tanystyrý jáne qalanyń ortalyǵynda keri sanaq saǵatyn iske qosý boldy.
Resmı rásim Dakardyń «Úlken teatrynda» ótti. Іs-sharaǵa Senegal prezıdenti Basırý Dıomaı Faıe, Halyqaralyq Olımpıadalyq komıtetiniń basshysy Kırstı Koventrı, HOK-tyń oıyndarǵa arnalǵan Úılestirý komıssııasynyń tóraǵasy Hamfrı Kaıange jáne Senegaldyń Ulttyq Olımpıadalyq komıtetiniń prezıdenti Mamadý Ndııaı qatysty.
Aıta ketsek, qarasha aıynda merekelik baǵdarlama dástúrli Dakar en Jeux mádenı-sporttyq festıvalimen jalǵasady. Ol jasóspirimder Olımpıadasy ótetin úsh qalada – Dakar, Dıamnıadıo jáne Salıda uıymdastyrylady. Festıvalge myńdaǵan oqýshy, ónerpaz jáne jergilikti turǵyn qatysyp, sport, mýzyka jáne óner arqyly olımpıadalyq qundylyqtardy dáriptemek. Sonymen qatar Dakarda ashyq esik kúnderi ótedi. Onda túrli eldiń ókilderi jarys nysandarymen, daıyndyq kezeńderimen tanysyp, ózara yntymaqtastyq máselelerin talqylaı alady.
Dakar-2026 jasóspirimder Olımpıadasy 2026 jyldyń 31 qazanynan 13 qarashasyna deıin ótedi. Bul Olımpıada tarıhta alǵash ret afrıkalyq qurlyqta uıymdastyrylady.
Aldaǵy oıyndarǵa qatysýshylar úshin jalpy talap - Olımpıadanyń jabylý sátinde 17 jastan aspaý qajet. Eń tómengi jas sanaty ár sport túriniń ereksheligine qaraı tıisti halyqaralyq federatsııalarmen bekitiledi.
Baǵdarlamaǵa 25 sport túri enedi. Al taǵy 10 sport túri kórsetilimdik formatta usynylady. Bul qabyldaýshy el men aımaqtaǵy jastardyń sportqa qyzyǵýshylyǵyn arttyryp, jańa baǵyttarda óz múmkindikterin baıqap kórýge jol ashady.
Burynǵy jasóspirimder Olımpıadasynan aıyrmashylyǵy – Dakar-2026 oıyndarynda Halyqaralyq Olımpıadalyq komıteti dástúrli irikteý júıesinen bas tartty. Elderge beriletin kvotalar HOK pen halyqaralyq federatsııalar tarapynan ortalyqtandyrylǵan túrde bólinedi.
Táýelsizdik alǵannan beri qazaqstandyq sportshylar jazǵy jasóspirimder Olımpıadalarynda (2010, 2014, 2018) barlyǵy 9 altyn, 6 kúmis jáne 9 qola medal jeńip aldy.
Aıta keteıik, Qazaqstan quramasy Jasóspirimder Azıadasyn úzdik úshtikte túıindedi.