Jasóspirimder Olımpıadasy: Qazaqstannyń eki boksshysy altyn úshin judyryqtasady
ASTANA. KAZINFORM — Dakarda (Senegal) ótip jatqan IV jazǵy jasóspirimder Olımpıadasynda bokstan fınaldyq jekpe-jekterge qatysatyn sportshylar anyqtaldy, dep habarlaıdy UOK baspasóz qyzmeti.
Qazaqstan quramasynyń eki ókili altyn medal úshin sharshy alańǵa shyǵady.
57 kelige deıingi salmaqta Aqnur Tursynǵalı brazılııalyq Sara Kampospen kezdesedi. Jartylaı fınalda qazaqstandyq boksshy Ýkraına ókili Evangelına Petrýkti tóreshilerdiń sheshimimen (4:1) jeńdi. Al onyń fınaldaǵy qarsylasy vengrııalyq Jofııa Chenge Kıshten 5:0 esebimen basym tústi.
70 kelige deıingi salmaqta óner kórsetetin Bıbarys Áshirbaı fınalda Ulybrıtanııa boksshysy Maıkl Moenmen qolǵap túıistiredi.
Bıbarys jartylaı fınalda meksıkalyq Horhe Lýıs Neblas Gýterresti 5:0 esebimen jeńip, sheshýshi kezeńge joldama aldy. Al brıtandyq boksshy dál osyndaı eseppen BAÁ ókili Mýhammed Moaazdan basym tústi.
Qazaqstandyq qos boksshynyń fınaldyq jekpe-jegi búgin, 12 qarashada ótedi. Ekeýi de Astana ýaqytymen saǵat 17:00-de bastalatyn kúndizgi sessııada óner kórsetedi.
Aıta keteıik, Qazaqstan quramasynyń taǵy bir ókili Maral Tólepbergen jasóspirimder Olımpıadasyn qola medalmen aıaqtady. Ol 54 kelige deıingi salmaq dárejesiniń jartylaı fınalynda ózbekstandyq Sabrına Chakomanovadan 0:5 esebimen jeńilip qaldy.
Osydan buryn boksshy Maral Tólepbergen jasóspirimder Olımpıadasynda qola júldege ıe bolǵanyn jazdyq.
