Jasóspirimder qylmysy 30 paıyzǵa tómendedi

ASTANA. KAZINFORM – Úkimet 2026-2030 jyldarǵa arnalǵan «Qazaqstan balalary» tujyrymdamasyn bekitti. Bul týraly Ortalyq kommýnıkatsııalar qyzmeti alańynda ótken brıfıngide Qazaqstan Respýblıkasy Іshki ister mınıstrligi Ákimshilik polıtsııa komıteti tóraǵasynyń orynbasary Ǵalym Sarǵulov málim etti.

Spıkerdiń aıtýynsha, tujyrymdama balalardyń quqyqtaryn qorǵaý salasyndaǵy qoldanystaǵy barlyq sharalar men baǵdarlamalardy biriktiredi. Sonymen qatar tájirıbelik profılaktıkalyq is-sharalar kesheni júzege asyrylyp keledi. Atap aıtqanda, aktsııalar, turǵylyqty jeri boıynsha reıdter, mektepterdegi dárister, «Túngi qaladaǵy balalar», «Jasóspirim» jedel-profılaktıkalyq is-sharalary jáne basqa da jumystar júrgizilip jatyr. Árbir mektepke polıtsııa qyzmetkerleri bekitilgen.

– Budan bólek, quqyqtyq túsindirý sabaqtary uıymdastyrylyp, «Erlik sabaǵy» jáne jeke qaýipsizdik máseleleri boıynsha dárister ótkizilip júr. Qabyldanǵan sharalardyń nátıjesinde jyl basynan beri jasóspirimder qylmysy 30%-ǵa tómendegen, - dedi ol. 

Sonymen qatar spıker jasóspirimder arasyndaǵy quqyq buzýshylyqtardyń aldyn alý tek polıtsııa sharalarymen shektelmeıtinin atap ótti.

– Quqyq buzýshylyqtardyń negizgi sebepteri kóbine tıisti tárbıe men baqylaýdyń jetkiliksizdigine baılanysty. Osy oraıda ol mektep dırektorlary men pedagogıkalyq ujym ókilderin birlesip jumys isteýge shaqyryp, kóp másele ortaq qyraǵylyq pen jaýapkershilikke baılanysty, - dedi ol.

Aıta keteıik, Atyraýda qatarlastaryn baltamen qýalaǵan oqýshyǵa qatysty qylmystyq is qozǵaldy.