Jasóspirimder Azıadasynyń chempıony: Maqsatym — olımp bıigin baǵyndyrý
ORAL. KAZINFORM — Batysqazaqstandyq dzıýdoshy Fatıma Supyǵalıeva jýyrda Manama qalasynda (Bahreın) ótken jasóspirimder Azıadasynda top jarǵan edi. Týǵan jerine oralǵan sportshyǵa Kazinform tilshisi birneshe saýal qoıǵan edi.
— Fatıma, dzıýdoǵa qyzyǵýshylyǵyń qalaı oıandy, sportpen neshe jasyńnan aınalysa bastadyń?
— Ózim Batys Qazaqstan oblysy Terekti aýdanynda ómir esigin ashtym. Dzıýdomen toǵyz jasymnan beri aınalysyp kelemin. Sportqa kelýime ákem Altynbek pen kókem Qazybek yqpal etti. Olar osy sporttyń arqasynda el kórip, jer kórip, kóptegen tabysqa qol jetkizdi. Ákem — dzıýdodan Qazaqstannyń sport sheberi, sambodan halyqaralyq dárejedegi sport sheberi, oǵan qosa joǵary sanatty jattyqtyrýshy.
Alǵashqy ári qazirgi bapkerim de — ákem. Sondaı-aq ekinshi jattyqtyrýshy Erlan Ońalovtan da kóp nárse úırendim. Ol kisi de — ákemniń shákirti.
— Ómirde kimdi úlgi tutasyń?
— Aldymen óz anam Dılara Bektemirqyzyn aıtar edim. Meniń ár basqan qadamyma úmitpen qarap, únemi jany ashyp otyrady. Dúnıede anadan artyq eshkim joq qoı. Sodan keıin sportta Dzıgoro Kanony alǵa qoıamyn. Dzıýdony oılap shyǵarǵan adam. Sonyń arqasynda dzıýdo kúlli álemge keńinen jaıylyp, adamdar dendep aınalysatyn ádemi sport túrine aınaldy.
— Bıyl birneshe halyqaralyq jarysta jeńis bıiginen kórindiń. Almatyda kadetter arasynda ótken Azııa kýbogynda aldyńa jan salmadyń. Odan soń Berlınde Millennium Team Cadet European Cup týrnırinde kúmis júldege qol jetkizdiń. Endi, mine, jasóspirimder Azıadasyn baǵyndyryp otyrsyń. Osy aıtýly dodadaǵy qarsylastaryń qıyn boldy ma?
— Olardyń bári de óte jaqsy daıyndyqpen kelgenderi kórinip turdy. Bári de óz elderiniń namysyn abyroımen qorǵaý úshin baryn salady ǵoı. Qaı-qaısysyna da berik ustanymmen, utamyn degen nıetpen shyqtym. Aldymen 52 kelige deıingi salmaqta tájik qyzyn joldan taıdyrdym. Sodan keıin ózbekstandyq Zýhra Alımovamen beldesý óte qıyn boldy. Odan da súrinbeı óttim. Al fınalda qyrǵyzstandyq Mılena Borýbolotovany taza túsirdim.
— Dzıýdodaǵy súıikti tásiliń qandaı?
— Eń jaqsy kóretin ádisim — Ýchı-mata. Osy tásildi eshkim tótep bere almaıtyndaı etip qoldaný úshin úzbeı jetildirýdemin. Árıne, sheberlik shyńyna jetý úshin kóp ter tógip, eńbektený kerektigin jaqsy túsinemin.
— Sport pen oqýdy qatar alyp júrý ońaı emes shyǵar?
— Árıne, óte qıyn. Qazirgi kezde Oral qalasyndaǵy olımpıada rezerviniń oblystyq mamandandyrylǵan mektep-ınternat-kolledjiniń 10-synybynda oqımyn. Bilimge de, sportqa da ýaqyt tabýǵa bolady dep oılaımyn. Oblystyq dene shynyqtyrý jáne sport basqarmasy, BQO dzıýdo federatsııasy tolyq jaǵdaı jasap, únemi qoldaý kórsetedi. Jýyrda Japonııaǵa jattyǵý úshin jol júrmekshimin.
Mektebimniń basshylarynan bastap ustazdarym da maǵan tilekshi bolyp otyrady. Jeńispen oralsam, qarsylap alady.
— Sporttan basqa súıikti isiń qandaı?
— Bos ýaqytym bola qalǵan jaǵdaıda án salyp, kitap oqyǵandy jaqsy kóremin. Sýret salǵandy da janym súıedi.
— Dzıýdo olımpıadalyq sport túri ekendigi belgili. Endeshe, aldaǵy arman-maqsattaryń jóninde ne aıtar ediń?
— Armanym kóp. Sporttaǵy maqsatym bireý, ol — Olımpıada chempıony bolý. Adam keı armandaryna qol jetkize almaı qalýy múmkin. Al aldyna shyndap maqsat qoısa, sol úshin bar kúsh-jigerin jumsasa, túbinde jetedi dep oılaımyn. Maqsatynyń oryndalýy múmkin ekenine senedi. Men áli ózimdi kishkentaımyn dep sanaımyn. Sporttaǵy belesterge jetkennen keıin ǵana óz tájirıbemmen bóliskim keledi. Aldaǵy ýaqytta dzıýdoda elimniń atyn shyǵaryp, kók baıraǵymyzdy jelbirete bilsem, odan asqan baqyt joq.
— Olaı bolsa, Fatıma, aldaǵy jolyńa tek sáttilik tileımiz.
Eske sala keteıik, budan buryn jasóspirimder Azıadasynda Qazaqstan quramasyndaǵy eki dzıýdoshynyń altyn medal alǵanyn jazǵan edik.