Jasóspirimder arasyndaǵy álem chempıonattary: Qazaqstan sportshylary 6 medal jeńip aldy
ASTANA. KAZINFORM – Ártúrli sport túrlerinen jasóspirimder men kadetter arasyndaǵy álem chempıonattary bastaldy. Qazaqstandyq sportshylar olımpıadalyq sport túrlerinen 6 medal – 2 altyn, 2 kúmis jáne 2 qola júldege ıe boldy, dep habarlaıdy QR Týrızm jáne sport mınıstrliginiń baspasóz qyzmeti.
Qazaqstandyq jasóspirimder halyqaralyq arenada barǵan saıyn senimdi óner kórsetip, jarys kestelerinde joǵary nátıjelerge qol jetkizip keledi. Bul – elimizdiń sporttyq rezerviniń ósip kele jatqanynyń jaqsy kórsetkishi.
Bratıslavada ótip jatqan 20 jasqa deıingi sportshylar arasyndaǵy kúres túrlerinen álem chempıonatynda Qazaqstan quramasy alǵashqy altyn medalin jeńip aldy. Grek-rım kúresinen 67 kelige deıingi salmaqta Qazybek Qalmaǵambetov álem chempıony atandy.
Jarysta erkin jáne áıelder kúresinen Qazaqstan ókilderi júldeler úshin básekeni jalǵastyrýda. Chempıonat 23 tamyzda aıaqtalady.
Qazaqstandyq sportshylar Ekvadordyń Gýaıakıl qalasynda ótip jatqan kadetter arasyndaǵy dzıýdodan álem chempıonatynda da sátti óner kórsetip jatyr. Jarystyń alǵashqy kúninde qazaqstandyq dzıýdoshylar 5 medal – 1 altyn, 2 kúmis jáne 2 qola jeńip aldy. 60 kelige deıingi salmaqta Ǵabıt Rasulhan álem chempıony atandy.
Jeke jarystar 22 tamyzda aıaqtalady. Al 23 tamyzda aralas komandalyq týrnır ótedi.
Jasóspirimder arasyndaǵy birqatar álem chempıonattary jazǵy Azııa oıyndary ótetin kezeńge sáıkes keledi.
Osylaısha, qazaqstandyq sport rezervi úshin aldaǵy kezeń asa mańyzdy ári qarqyndy bolmaq: jas sportshylar álem chempıonattarynda júldeler úshin baq synasa, eldiń eresekter quramasy Azııa oıyndarynda Qazaqstan namysyn qorǵaıdy.
Jasóspirimder arasyndaǵy nátıjelerdiń ósýi sportshylardy daıarlaý tásilderiniń ózgerýimen tikeleı baılanysty. Jattyǵý úderisine ǵylymı ádister belsendi engizilip, jas sportshylarmen jumysqa ǵylymı toptar tartyla bastady.
Jas sportshylardy keshendi súıemeldeýge erekshe nazar aýdarylyp otyr. Bul jattyǵý úderisin josparlaý men fızıkalyq kórsetkishterdi baqylaýdan bastap, qalpyna keltirý jáne jaraqattardyń aldyn alýǵa deıingi baǵyttardy qamtıdy. Ońaltý men qalpyna keltirýdiń zamanaýı tásilderi sportshylarǵa júktemelerge tıimdi beıimdelýge jáne maýsym boıy qajetti daıyndyq deńgeıin saqtaýǵa múmkindik beredi.
-Mundaı júıeli jumys jas sportshylardy sapaly daıarlaýǵa jaǵdaı jasap, Qazaqstannyń halyqaralyq arenadaǵy pozıtsııasyn birtindep nyǵaıtýǵa múmkindik beredi. Jasóspirimderdiń jaqsy nátıjeleri – bolashaqta ulttyq qurama deńgeıine kóterile alatyn básekege qabiletti sporttyq rezerv qalyptasyp kele jatqanyn kórsetedi.
Jasóspirimderdiń tabysty óner kórsetýi – balalar men jasóspirimder sportyn damytý baǵytyndaǵy júıeli jumystyń nátıjesi. Jattyǵýǵa zamanaýı jaǵdaı jasaý, ǵylymı tásilderdi qoldaný, bilim berý baǵdarlamalaryn damytý jáne qalpyna keltirý júıesin jetildirý jas sportshylardyń áleýetin tolyq ashýǵa múmkindik beredi. Búgingi jasóspirimder – Qazaqstannyń ulttyq quramalarynyń bolashaq negizi,-delingen habarlamada.
Aıta keteıik, qazaqstandyq «klassıkter» U20 álem chempıonatyn bir altyn medalmen aıaqtady.
