Jasóspirimder arasyndaǵy álem chempıonatynyń fınalynda Qazaqstan namysyn bir ǵana boksshy qorǵaıdy
Erevan qalasynda (Armenııa) ótip jatqan bokstan jasóspirimder arasyndaǵy 2023 jylǵy álem chempıonatynyń fınalyna Qazaqstan quramasynan bir ǵana boksshy shyqty. Kazinform bul týraly Sports.kz-ke silteme jasap habarlaıdy.
Qazaqstan quramasynan álem chempıonatynyń fınalyna bir ǵana boksshy shyǵa aldy. Ol – 54 kelige deıingi salmaqta óner kórsetken Nurasyl Tólebek. Endi ol fınalda úndistandyq Djatınmen judyryqtasady.
Nyǵman Nyǵmet (48 keli) te fınalǵa shyǵý úshin baryn salǵan bolatyn. Biraq jartylaı fınaldyq kezdesýde armenııalyq Vagarshak Keıanǵa ese jiberip, týrnırdi qola medalmen aıaqtady.
Bastapqyda Qazaqstan erler quramasynyń 2023 jylǵy jasóspirimder arasyndaǵy álem chempıonatyna on úsh boksshy qatysqan bolatyn.
Qazaqstan áıelder quramasynyń týrnırdegi ónerine kelsek, fınalda úsh sportshy el namysyn qorǵaıdy: Aıajan Sydyq (54 keli), Aısulý Muhıt (66 keli) jáne Tolǵanaı Qasymhan (60 keli).
