Jasóspirimder arasynda sýıtsıdtiń kóbeıýi alańdatady – Tamara Dúısenova

ASTANA. KAZINFORM – Úkimet basshysynyń orynbasary Tamara Dúısenova densaýlyq saqtaý salasyna qatysty birqatar máseleni kóterip, mınıstrge tapsyrma berdi.

«Qyzylshaǵa qatysty jaǵdaı jergilikti sanıtarlyq-epıdemıologııalyq uıymdar qyzmetiniń tómen deńgeıin jáne mınıstrlik tarapynan tıisti úılestirý men baqylaýdyń joqtyǵyn kórsetti. Sońǵy jyldary bul sala qyzmeti tamaq ónimderiniń sapasy men qaýipsizdigin qamtamasyz etý boıynsha ustanymyn joǵaltty. Densaýlyq saqtaý mınıstrligine sanıtarlyq-epıdemıologııalyq uıymdar qyzmetiniń jumysyn qaıta qaraýdy jáne 1 sáýirge deıin tıisti usynystar ázirleýdi tapsyramyn», - dedi Tamara Dúısenova Densaýlyq saqtaý mınıstrliginiń keńeıtilgen alqa otyrysynda.

Odan bólek, vıtse-premer eldegi sýıtsıd jaǵdaıyna alańdatýshylyq tanytty.

«Jasóspirimder arasynda sýıtsıdtiń kóbeıýi alańdatady. Bul jaǵdaı eresekter arasynda da azaımaı tur. Munyń sebebin anyqtaý qajet. Tutastaı alǵanda mınıstrlik pen jergilikti atqarýshy organdar óńirlerdiń ereksheligin eskere otyryp basymdyqtardy aıqyndaý jáne barlyq respýblıkalyq ortalyqtardy tarta otyryp, júıeli jumys isteýi qajet», - deıdi ol.