Jasóspirimdi jezókshelikke májbúrleý: jábirlenýshi turatyn aýmaq táýlik boıy kúzetiledi
QYZYLORDA. KAZINFORM - Qyzylorda qalasynda synyptastarynyń májbúrleýimen jezókshelikpen aınalysyp japa shekken qyz balanyń mekenjaıy kúzetpen qamtamasyz etildi. Bul jóninde agenttik tilshisine Bala quqyqtaryn qorǵaý jónindegi oblystyq ýákil Jaqsygúl Toǵanova aıtyp berdi.
«Balanyń qaýipsizdigin saqtaý maqsatynda polıtsııa departamenti arqyly táýlik boıy úıiniń aýmaǵyna kúzet qyzmeti qoıyldy. Árıne, barlyq is-áreketter men kómek anasynyń kelisimine jáne balanyń qalaýyna sáıkes jasalady. Aldaǵy kezeńde de múddeli memlekettik organdar tarapynan barlyq kómek ýaqtyly jasalady. QR Qylmystyq-protsestik kodeksiniń 201-babyna sáıkes, sotqa deıingi tergep-tekserý derekteri jarııa etilmeıdi», - dedi J. Toǵanova.
Jasóspirim tolyqqandy medıtsınalyq tekserýden ótip, psıholog tarapynan kómek alyp jatyr.
«Oqıǵadan keıin jasóspirimniń anasymen sóılesip, balamen kezdestim. Operatıvti túrde balaǵa medıtsınalyq jáne psıhologııalyq kómek kórsetý jumystaryn júrgizýge járdem jasaldy. Arnaıy kezdesý ýaqyttary belgilendi. Alaıda, anasy tarapynan aıtylǵan sebepterge oraı kezdesý jıiligi saqtalmady. Keıingi ýaqytta bala psıholog mamandardyń úsh ret qabyldaýynda boldy. Munan keıin Densaýlyq saqtaý basqarmasy orynbasarynyń kómegimen bala tolyqqandy medıtsınalyq tekserýlerden ótkizildi. Dárigerlerdiń keńesimen balany aýrýhanaǵa jatqyzý usynylǵanymen, anasy kelisim bermeý týraly qolhatyn berdi. Bul rette anasy suraǵan qolaıly ýaqytta ýchaskelik dárigerlerdi úıge shaqyrý kómekteri de uıymdastyryldy. Bala tolyqqandy dárigerlerdiń baqylaýyna alyndy», - dedi Jaqsygúl Toǵanova.
Anasy ýaqtyly alǵan kómektiń nátıjesinde balanyń jaǵdaıynda oń ózgerister baryn málim etken.
Eske salsaq, Qyzylorda qalasynda mektep oqýshylary «synyptasyn seks-quldyqta ustady» dep kúdikke ilindi.
Oqýshy qyzdyń ata-anasy jaǵdaıdy qoǵamdyq qorǵa habarlaǵan. Qyzylorda polıtsııasy kúdiktilerdi ustap, ýaqytsha ustaý ızolıatoryna qamady. Keıin kúdikke ilingen mektep oqýshylary úıqamaqqa aýystyryldy.
Sondaı-aq osy keleńsizdikke jol bergeni úshin bilim salasynyń bir top qyzmetkeri jumysynan bosatyldy.
