Jasóspirimdi ajaldan qutqaryp qalǵan Ulttyq ulan sarbazdary marapattaldy
ASTANA. KAZINFORM – Búgin Ulttyq ulannyń 5573 áskerı bóliminiń saptyq alańynda jasóspirimdi ajaldan qutqaryp qalǵan Ulttyq ulan sarbazdary marapattaldy.
Polisia.kz saıtynyń málimetinshe, atalmysh is-sharaǵa áskerı bólim komandıri Aıan Esjanov, «Aq jol» QDP Astana qalasy boıynsha fılıaly tóraǵasynyń orynbasary, Máslıhat depýtaty Abzal Ábenov, partııanyń jastar saıasaty boıynsha keńesshisi Ulan Qusaıynov, Astana qalasynyń tótenshe jaǵdaılar departamenti bastyǵynyń orynbasary Madııar Myrzageldınov qatysty.
Elordalyq quramanyń jaýyngerleri qala tynyshtyǵyn kúzetý boıynsha qyzmetke túsý úshin saltanatty sap túzep turdy. Áskerı bólim komandıri marapattaý úshin áskerı jasaqty minber aldyna shaqyrdy. Sarbazdar úshtigi áskerı júrispen minberdiń aldyna kelip, sapqa turdy. Alǵash bolyp «Aq jol» partııasynyń ókilderi sarbazdardy marapattady. Eki sarbazǵa maqtaý qaǵazyn usynsa, qatardaǵy Álisher Mahmettiń keýdesine medal taqty.
Sodan keıin, Astana qalasynyń tótenshe jaǵdaılar departamenti bastyǵynyń orynbasary Madııar Myrzageldınov QR Tótenshe jaǵdaılar mınıstriniń buıryǵyn oqyp, ulandyq Álisher Mahmetke vedomstvonyń medalin tabys etti.
– Ulttyq ulan sarbazy Álisherge oqıǵa ornynda erlik tanytyp, adam ómirin qutqarǵany úshin alǵys bildiremiz, - dedi Myrzageldınov.
Sarbazdyń bolsa, bul onyń Otan aldyndaǵy mindeti ekenin jáne quramanyń barlyq sarbazy onyń ornynda bolsa osylaı jasaıtynyn aıtty.
– Men úshin búgingi marapattardyń orny erekshe. Erligimdi eskergeni úshin Ulttyq ulan Bas qolbasshysyna, áskerı bólim komandırine jáne QR Tótenshe jaǵdaılar mınıstirligi men partııa ókilderine alǵys aıtamyn. Bizdiń mindetimiz tynyshtyqty qamtamasyz etý, elge kómektesý, - dedi jas sarbaz.
Qatardaǵy Álisher Mahmet Soltústik Qazaqstan oblysynyń týmasy, ótken jyldyń qarasha aıynda 5573 áskerı bólimine Otan aldyndaǵy boryshyn óteý úshin kelgen. Ol jastardy azamattyq boryshyn óteýge shaqyrady.
Eske salyp keteıik, 15 maýsym kúni keshki ýaqytta Astana qalasynda 5573 áskerı bóliminiń qatardaǵy jaýyngerleri Álisher Mahmet, Arsen Qazı men Rınat Dosşanov qyzmet atqarý kezinde Aqbulaq ózeninen júzip ótemin dep sýǵa bata jazdaǵan № 63 mektep oqýshysyn qutqarǵan bolatyn.
