Jasóspirimdi áskerge kósheden eriksiz alyp ketý zańdy ma – mınıstrlik jaýaby

ASTANA. KAZINFORM – Qorǵanys mınıstrligi jastardy áskerge kósheden nemese jumys ornynan súırep alyp ketýge qatysty túsinik berdi.

Ortalyq kommýnıkatsııalar qyzmeti alańynda ótken baspasóz máslıhatynda tómendegi saýal qoıyldy: «Qazir kámelet jasyna tolǵan jastardy oqý ornynda oqymasa, kóshede, jumys nemese demalys ornynan áskerge kúshtep alyp ketip jatyr. Tipti ata-anasymen de sóılestirmeı alyp ketken jaǵdaılar bar. Jastardy kósheden ustap alyp, áskerge áketý qanshalyqty zańdy?».

«Jalpy bul áreket kóktemgi shaqyrylymda boldy, kúzgi shaqyrylymda ol áreketke barǵan joqpyz, sebebi máseleniń ońtaıly sheshimi tabyldy. Qazirgi tańda ákimniń ıdeologııa jónindegi orynbasarlary jastardy tárbıeleý baǵytynda jumys júrgizip jatyr. Sol sııaqty alǵashqy áskerı daıyndyq páni muǵalimderimen de tyǵyz jumys qolǵa alyndy. Odan qaldy zeınettegi áskerı ardagerlerdiń úgit-nasıhat sharalarynyń arqasynda biz qazir kósheden ustaý nemese kúshtep áketýge jol berip jatqan joqpyz», - dep jaýap berdi QR Qarýly kúshteri bas shtaby uıymdastyrý-jumyldyrý jumysy departamenti bastyǵynyń orynbasary Farhat Aıdarbekov OKQ-de ótken brıfıngide.

Sonymen qatar atalǵan máselege qatysty Qorǵanys mınıstrliginiń resmı ókili Rýslan Jangýlın pikir bildirdi.

«Osyndaı faktiler kóbinese BAQ jáne áleýmettik jelilerde tarap jatady, biraq olardyń sany kóp emes. Ásker qataryna jylyna 40 myńǵa tarta azamatty shaqyrsaq, olardyń arasynda kósheden alyp ketken birer jaǵdaı bolyp qalýy múmkin. Іshki ister organdary áskerge kelmeı júrgenderdi izdestirý sharalaryn qamtamasyz etedi, bul jerde ishki ister organdarynyń áreketteri zańdy. Al azamat nelikten ózi kelmeıdi? Onyń ártúrli sebepteri bar, mysaly, ol bir jerde tirkeýde turyp, ózi basqa qalada júrýi múmkin», - deıdi ol.