«Jasóspirim» is-sharasy barysynda 5200-den astam qaraýsyz qalǵan bala anyqtaldy - ІІM

ASTANA. KAZINFORM – 10 sáýirden bastap elimizdiń barlyq óńirinde «Jasóspirim» jedel aldyn alý is-sharasy ótkizildi. Bul sharanyń basty maqsaty — balalardy qaýipti jaǵdaılardan qorǵaý, der kezinde kómek kórsetý jáne quqyq buzýshylyqqa ıtermeleýi múmkin sebepter men jaǵdaılardyń aldyn alý, – dep habarlaıdy Polisia.kz.

Іs-shara barysynda polıtsııa bólimderine 23,5 myń jasóspirim jetkizildi, onyń ishinde 124-i — qylmys jasaǵany úshin, 18,5 myńnan astamy — ákimshilik quqyq buzýshylyqtar úshin. Árqaısysyna quqyqtyq baǵamen qatar, profılaktıkalyq qoldaý kórsetildi.

- 5200-den astam qaraýsyz qalǵan bala anyqtalyp, qaýipsiz oryndarǵa ornalastyryldy. 853 jasóspirim beıimdeý ortalyqtaryna jiberilip, áleýmettik jáne psıhologııalyq kómek aldy. Іs-shara aıasynda 26 myńǵa jýyq ákimshilik quqyq buzýshylyqtyń joly kesildi, onyń ishinde 3 myńy — balasyn durys tárbıelemegen ata-analarǵa qatysty, - dedi ІІM ÁPK-niń erekshe tapsyrmalar jónindegi aǵa ınspektory Aqtoty Boranova.

ІІM qyzmetkeriniń sózinshe, aýyr zardaptardyń aldyn alý boıynsha sharalar qabyldandy. 532 usaq buzaqylyq der kezinde toqtatyldy, 344 ret kámeletke tolmaǵandarǵa alkogol satpaq bolǵan jaǵdaı anyqtaldy. 20 myńǵa jýyq bala túngi ýaqytta úıden tys, onyń ishinde oıyn-saýyq oryndarynda júrgeni anyqtaldy.

Sonymen qatar qaýipti zattar, esirtki jáne qarý tárkilendi. Bul — ýaqytyly qabyldanǵan sharalar birqatar qaıǵyly jaǵdaıdyń aldyn alǵanyn kórsetedi. 954 jasóspirim men 815 ata-ana profılaktıkalyq esepke alyndy. Olarmen qosymsha áleýmettik-tárbıelik jumys júrgiziledi. Mektepterde 6200-den astam jasyryn saýalnama júrgizildi. 64 devıantty minez-qulyq baıqalǵan jasóspirim anyqtalyp, baqylaýǵa alyndy, mamandardyń qoldaýyna ıe boldy. 20 myńnan astam quqyqtyq dáris pen profılaktıkalyq kezdesý ótkizildi.

Aqparattyq qaýipsizdikke de erekshe nazar aýdaryldy. balalarǵa qaýip tóndiretin 4300-den astam ınternet-kontent buǵattaldy. Sonymen qatar balalardyń bos ýaqytyn tıimdi uıymdastyrý úshin ákimdikterge 367 usynys-hat joldandy.

Osyǵan deıin polıtsııa tórt aıda 20 uıymdasqan qylmystyq toptyń jolyn kesip, 3,5 tonna esirtki tárkilegeni týraly jazdyq.